68579

मळगावने अनुभवले परमोच्च भक्तिमय वातावरण

श्री देव मायापूर्वचारी पुनःप्रतिष्ठापना सोहळा ः चार दिवसांत हजारो भाविकांची भेट

सकाळ वृत्तसेवा
सावंतवाडी, ता. ६ ः सोनुर्ली व मळगाव या दोन गावांचे परम श्रद्धास्थान असलेल्या श्री देव मायापूर्वचारी आणि त्यांच्या पंचायतन व परिवार देवतांच्या मूर्तींचा ऐतिहासिक पुनःप्रतिष्ठापना सोहळा २ ते ५ जून या चार दिवसांच्या कालावधीत असीम उत्साह आणि परमोच्च भक्तिमय वातावरणात दिमाखदारपणे झाला. या अलौकिक सोहळ्याने संपूर्ण परिसरावर आध्यात्मिक चैतन्याचे अधिराज्य गाजवले.
सोहळ्याच्या अंतिम आणि मुख्य प्रतिष्ठापनादिनी, पहाटेपासूनच मंदिराचा परिसर भाविकांच्या गर्दीने फुलून गेला होता. सकाळच्या मंगलमयी वातावरणात स्थलशुद्धी विधीने कार्यक्रमांना प्रारंभ झाला. त्यानंतर ७ वाजता देव उठवण्याचा पवित्र विधी मोठ्या भक्तिभावाने पार पडला. यानंतर तत्वन्यासहोम, तत्त्‍वन्यास आणि प्राणप्रतिष्ठा या अत्यंत महत्त्वाच्या विधींनी देवतांमध्ये प्राणशक्ती संचारित करण्यात आली. देवतांची महापूजा, बलिदान आणि पूर्णाहुतीसारख्या गूढ आणि पवित्र विधींनी धार्मिक वातावरण अधिकच भारले. विधींच्या सांगतेनंतर अभिषेक, आरती, मंत्रपुष्प आणि सामूहिक गाऱ्हाणे (प्रार्थना) भाविकांनी श्री चरणी अर्पण केले. सोहळ्याची परिणिती ब्राह्मण पूजन आणि महाप्रसाद वाटप करून झाली. या चारदिवसीय सोहळ्याचा प्रारंभ २ तारखेला प्रायश्चित्त विधीने झाला. सकाळी देवाला नारळ अर्पण करून, त्यांची संमती घेऊन केशवपन, पंचगव्य होम, पंचगव्य प्राशन आणि प्रायश्चित्त विधान संपन्न झाले. यामुळे मंदिराचे आणि भाविकांचे शुद्धीकरण झाले. ३ ला तत्त्वोद्धार विधी पार पडले. पुण्याहवाचन, संभारदान आणि मधूपर्क विधींनी सुरुवात झाली. यानंतर आचार्यादि ब्राह्मण वरण, स्थलशुद्धी, अज्ञोरहोम, देवांची महापूजा, तत्वचालन होम, तत्त्‍वोद्धार आणि पूर्णाहुती दिली गेली, ज्यातून देवतांच्या मूळ तत्त्वांचे पुनर्स्थापन झाले. ४ ला श्री देव मायापूर्वचारी सपरिवार देवता अर्चाविधी झाले. सकाळच्या प्रहरी स्थलशुद्धी, जलाधिवास, स्नानविधी आणि शय्याधिवाससारखे विधी पार पडले. यानंतर पीठदेवता स्थापना, अग्निस्थापना, वास्तुयजन, ग्रहयजन आणि पर्याय होम असे अनेक महत्त्वपूर्ण यज्ञ पार पडले. प्रत्येक दिवसाच्या सांगतेला महाप्रसादाचे वाटप केले. सोनुर्ली व मळगाव गावातील मानकरी आणि ग्रामस्थांनी या अलौकिक सोहळ्याचे अत्यंत उत्कृष्ट आणि यशस्वी असे आयोजन केले. त्यांच्या अथक प्रयत्नांमुळे हा सोहळा निर्विघ्नपणे आणि मोठ्या उत्साहात झाला. हा पुनःप्रतिष्ठापना सोहळा केवळ एक धार्मिक विधी नसून, तो या दोन्ही गावांच्या एकतेचे, श्रद्धेचे आणि सामुदायिक भावनेचे एक प्रतीक बनला आहे.
-------------
‘आमच्या डोळ्यांचे पारणे फिटले’
मळगाव आणि सोनुर्ली येथील भाविक मोठ्या संख्येने या ऐतिहासिक सोहळ्यासाठी उपस्थित होतेच. शिवाय नेमळे, निरवडे, वेत्ये, माजगाव या गावांमधील शिमधडे आणि असंख्य भक्तगणांनीही मोठ्या संख्येने उपस्थित राहून सोहळ्याचा आणि महाप्रसादाचा लाभ घेतला. या अलौकिक सोहळ्यामुळे ‘आमच्या डोळ्यांचे पारणे फिटले’, अशी भावना यावेळी उपस्थित भाविकांनी व्यक्त केली.