rat6p34.jpg-
68592
राजापूर : सागवे येथे सापडलेली तोफ.
-----------------
सागवेमध्ये सापडली ऐतिहासिक तोफ
धुळपांच्या वाड्याच्या खाणाखुणा; संशोधनाची गरज
सकाळ वृत्तसेवा
राजापूर, ता. ६ : तालुक्यातील सागवे-नाखेरे येथे रस्त्याचे काम करताना पुरातन तोफ सापडली आहे. या गावाच्या पलीकडे समोर उभा असलेला ऐतिहासिक विजयदुर्ग किल्ला आणि अलिकडील सागवे येथे सापडलेली आणि गेल्या कित्येक वर्षापासून भूगर्भामध्ये राहिलेल्या या पुरातन तोफेमुळे राजापूर तालुक्याचा ऐतिहासिक वारसा अधिक अधोरेखित झाला आहे.
छत्रपती शिवाजी महाराजांच्या पराक्रमाची साक्ष देणाऱ्या अनेक वास्तू वा पाऊलखुणा शहरासह तालुक्यामध्ये आहेत. त्यामध्ये तालुक्याच्या पश्‍चिम किनारपट्टीवरील नाटे येथील किल्ले यशवंतगड, आंबोळगड येथील किल्ला, तालुक्याच्या पूर्व भागातील घाटमार्ग अन् त्यामधील शिलालेख आदींचा समावेश आहे. त्यामध्ये आता सागवे-नाखेरे येथे सापडलेल्या प्राचीन तोफेची भर पडली आहे.
सागवे-नाखरे येथील ज्या परिसरामध्ये ही तोफ सापडली त्या परिसरामध्ये प्राचीन काळातील धुळपांचा वाडा असल्याचे सांगितले जाते आहे. सद्यःस्थितीमध्ये या वाडाच्या बांधकामाचा चौथरा आणि अन्य काही बांधकामाच्या पाऊलखुणा आजही या ठिकाणी आहेत. त्याच परिसरामध्ये पुरातन श्री माटेश्‍वर मंदिर आणि विहीरही आहे. त्यामुळे गेली अनेक वर्षे भूगर्भामध्ये असलेली आणि सध्या प्रकाशात आलेली तोफ छत्रपती शिवाजी महाराजांच्या काळातील असल्याचा प्राथमिक अंदाज वर्तवण्यात येत आहे; मात्र, त्याबाबत कोणताही ठोस पुरावा उपलब्ध नाही. या तोफेच्या अनुषंगाने त्यावर संशोधन झाल्यास प्राचीन इतिहास प्रकाशात येण्याची शक्यता आहे.

कोट
सोनाली टुकरूल, सरपंच सागवे
सागवे-नाखेरे येथे रस्त्याचे काम करताना एक पुरातन तोफ सापडली असून, येथील ग्रामस्थांनी ही तोफ गावातच एका ठिकाणी ठेवलेली आहे. ऐतिहासिक ठेवा असलेल्या या तोफेचे जतन आणि संवर्धन होणे गरजेचे असून त्या दृष्टीने पुरातत्त्व विभागाशी सागवे ग्रामपंचायतीतर्फे पत्रव्यवहार केलेला आहे.