रामेश्वर मंदिर रस्ता
दुरूस्तीस प्रारंभ
चिपळूण : श्री स्वामी समर्थ मठ ते रामेश्वर मंदिरदरम्यानच्या रस्त्याचे काम पालिकेने सुरू केले आहे. या रस्त्याची दुरुस्ती सुरू झाल्यामुळे नागरिकांमध्ये समाधानाचे वातावरण आहे. नागरिकांचा प्रवास आता सुखकर होणार आहे. या भागातील रस्ता अत्यंत महत्त्वाचा असून, धार्मिक स्थळांकडे जाणाऱ्या नागरिकांची ये-जा या मार्गावरून होते. त्यामुळे या रस्त्याची सुधारणा होणे गरजेचे होते. श्री स्वामी मठ ते रामेश्वर मंदिरापर्यंतचा रस्ता नादुरुस्त झाल्यानंतर येथील ग्रामस्थांनी माजी नगरसेवक उमेश सकपाळ, सामाजिक कार्यकर्ते संतोष पवार यांच्याकडे तक्रार केली होती. त्यांनी पालिकेच्या बांधकाम विभागातील अधिकाऱ्यांना घटनास्थळी बोलावून वस्तुस्थिती समजून सांगितली. त्यानंतर पालिकेने रस्त्याच्या दुरुस्तीचे काम सुरू केले.
-------------
गोवळकोट रस्त्यावर
मोकाट गुरांचा उपद्रव
चिपळूण : शहरातील गोवळकोट,गोवळकोट रोड येथे गुरे रस्त्यावर फिरत असल्याने रस्त्यावर चालणाऱ्या पादचाऱ्यांना तसेच वाहनचालकांना त्रास सहन करावा लागत आहे. यामुळे अपघात होण्याची शक्यता आहे. गुरांमुळे होणाऱ्या अपघाताला सर्वस्वी जबाबदार पालिका असेल. पालिकेने रस्त्यावर फिरणाऱ्या गुरांचा बंदोबस्त करावा, अशी मागणी युवक काँग्रेस जिल्हाध्यक्ष साजिद सरगुरोह यांनी केली आहे. गोवळकोट, गोवळकोट रोड हे चिपळूण शहरातील गजबजलेले ठिकाण आहे. याच रस्त्याला अनेक रस्ते जोडलेले आहेत. यात चिपळूण रेल्वे स्टेशन, गुहागर, लाईफकेअर हॉस्पिटल, मुंबई व चिपळूण शहरात जाणारा रस्ता असल्याने या ठिकाणी कायम नागरिकांची व वाहनचालकांची वर्दळ असते. गेल्या पंधरा दिवसांपासून पाऊस सुरू झाला आहे. गुरे रस्त्यावर फिरत असल्याने नागरिकांमध्ये भीतीचे वातावरण पसरले असून, रात्रीच्या वेळेस गुरे रस्त्याच्या मधोमध बसलेली असतात. तसेच रस्त्यावर फिरत असतात. त्यामुळे अपघातसुद्धा होत आहेत. तत्काळ गुरांचा बंदोबस्त करावा, अन्यथा गुरांना पालिकेच्या आवारात बांधण्यात येईल, असा इशारा युवक काँग्रेस जिल्हाध्यक्ष साजिद सरगुरोह यांनी दिला आहे.
--------------------