69274

भिरवंडे खलांतरवाडीतील
धबधब्याला तरुणांची पसंती

सकाळ वृत्तसेवा
कनेडी, ता. ९ ः भिरवंडे खलांतरवाडीतील नैसर्गिक धबधब्यावर आता तरुणांची गर्दी होऊ लागली आहे. पोहण्यासाठी सुरक्षित असलेल्या या धबधब्यावर लोक सहकुटुंब आस्वाद घेऊ लागले आहेत. कनेडी बाजारपेठेपासून पाच किलोमीटरवर खलांतरवाडी येथे नैसर्गिक धबधबा आहे.
सह्याद्रीच्या कुशीतून वाहणाऱ्या ओहळावर असलेल्या या धबधब्याला आता पाणी आले असून धबधबा प्रवाही झाला आहे. गेल्या शनिवारी आणि रविवारी येथे पर्यटकांची मोठी गर्दी होती. धबधब्यापर्यंत जाण्यासाठी पक्का रस्ता आहे. त्यामुळे सध्या येथे पर्यटकांची पावले पडू लागली आहेत. सुरक्षित असलेल्या धबधब्यावर लहान मुले, महिला आपल्या कुटुंबीयांसह पोहण्याचा आनंद घेत आहेत. विशेषतः तरुण वर्ग येथे मोठ्या प्रमाणात आकर्षित होताना दिसत आहे.