69376

सेवाभावी संस्थांची सिंधुदुर्गाला गरज

कविता शिंपी ः सावंतवाडीत ‘कोकण’तर्फे शाळांना जल शुद्धीकरण यंत्रणा

सकाळ वृत्तसेवा
सावंतवाडी, ता. ९ ः कोकण संस्थेच्या माध्यमातून करण्यात येणाऱे विविध उपक्रम कौतुकास्पद आहेत. अशा संस्थांची सिंधुदुर्ग जिल्ह्याच्या विकासासाठी तसेच विद्यार्थ्यांच्या शैक्षणिक भवितव्यासाठी नितांत गरज आहे, असे प्रतिपादन शिक्षणाधिकारी (माध्यमिक) कविता शिंपी यांनी केले.
ग्रामीण शाळांतील विद्यार्थ्यांना स्वच्छ, आरोग्यदायी पिण्याचे पाणी मिळावे, यासाठी कोकण कला व शिक्षण विकास संस्था आणि आयजीयुस इंडिया कंपनी यांच्या संयुक्त विद्यमाने जिल्ह्यात उपक्रम राबविण्यात आला. याचाच भाग म्हणून आज येथील पंचम खेमराज महाविद्यालयात आयोजित कार्यक्रमात जल शुद्धीकरण यंत्रणा प्रदान करण्यात आल्या. या कार्यक्रमात ४ महाविद्यालये व १५ शाळांना पाण्याच्या शुद्धीकरण यंत्रणा प्रदान करण्यात आल्या. यावेळी प्रमुख पाहुण्या म्हणून शिक्षणाधिकारी शिंपी बोलत होत्या.
सिंधुदुर्ग जिल्ह्यातील ग्रामीण भागातील शालेय विद्यार्थ्यांना सुरक्षित पाणी उपलब्ध नसल्याने त्यांच्या आरोग्यावर परिणाम होत असतो. ग्रामीण भागात अजूनही स्वच्छ पिण्याच्या पाण्याची व्यवस्था अपुरी असल्याने ही गरज लक्षात घेऊन आज येथील पंचम खेमराज महाविद्यालयात आयोजित कार्यक्रमात जल शुद्धीकरण यंत्रणा प्रदान करण्यात आल्या. या कार्यक्रमाच्या उद्‍घाटन प्रसंगी प्रमुख पाहुणे शिक्षणाधिकारी कविता शिंपी, तहसीलदार श्रीधर पाटील, गटविकास अधिकारी वासुदेव नाईक, बँक ऑफ इंडिया लीड बँक मॅनेजर ऋषिकेश गावडे, ‘सकाळ’चे विशेष प्रतिनिधी शिवप्रसाद देसाई, एस.पी.के. महाविद्यालयाचे प्रा. राजेंद्र शिंत्रे, कोकण संस्थाध्यक्ष दयानंद कुबल तसेच कोकण संस्थेचे कार्यकर्ते उपस्थित होते.
तहसीलदार पाटील यांनी संस्थेच्या योगदानाबद्दल आभार मानले. श्री. देसाई, श्री. गावडे, श्री. शिंत्रे यांनीही मार्गदर्शन केले. सिंधुदुर्ग कार्यालयाच्या वतीने रिजनल मॅनेजर प्रथमेश सावंत, अमित पाटील, अवंती धुरी, हनुमंत गवस, स्वाती मांजरेकर, समीर शिर्के, अमोल गुराम, प्रदीप पवार, गौरी आडेलकर, वैष्णवी म्हाडगुत, फेमिना डान्टस यांनी कार्यक्रमासाठी सहकार्य केले.