- rat१०p६.jpg-
P25N69608
चिपळूण ः विद्यार्थ्यांचा सत्कार करताना भाजपचे पदाधिकारी.
---
आवड पाहूनच अभ्यासक्रम निवडा
प्रा. लीला बिरादार ः चिपळूण भाजपतर्फे विद्यार्थी सोहळा
सकाळ वृत्तसेवा
चिपळूण, ता. १० ः विद्यार्थ्यांनी भविष्याचा वेध घेत आपली आवड, अभ्यासाची प्रगती हे डोळ्यासमोर ठेवून दहावीनंतर अभ्यासक्रम निवडावा. खास मित्र किंवा मैत्रीण ज्या महाविद्यालयामध्ये प्रवेश घेतात तिथे प्रवेश घेण्यापेक्षा सर्व बाजूने विचार करून अनुभवी व्यक्तीचे मार्गदर्शन घ्यावे. तसे केल्यास भविष्यात त्रास होत नाही, असा सल्ला डीबीजे महाविद्यालयाच्या निवृत्त उपप्राचार्य लीला बिरादार यांनी दिला.
भारतीय जनता पार्टी चिपळूण शहर मंडळातर्फे परशुराम नगर, राधाकृष्ण नगर, रावतळे या भागातील गुणवंत दहावी, बारावी विद्यार्थ्यांच्या सत्कारावेळी ते बोलत होते. हा कार्यक्रम डीबीजे महाविद्यालयाच्या सेमिनार हॉलमध्ये झाला. या वेळी महिला जिल्हाध्यक्षा वर्षा ढेकणे, डीबीजे महाविद्यालयाच्या निवृत्त उपप्राचार्य लीला बिरादार, विद्या क्लासेसच्या संचालिका अमृता जोशी, शहराध्यक्ष शशिकांत मोदी, विजय चितळे, आशिष खातू, प्रणाली सावर्डेकर, साईनाथ कपडेकर आदी उपस्थित होते.
आपल्याला काय झेपेल आणि जो अभ्यासक्रम घेणार आहोत तो भविष्यात रोजीरोटी देणार का, याची माहिती विद्यार्थ्यांनी घ्यावी. सध्या संगणक विभागात खूप क्रांती झाली आहे. याचा नेमका काय परिणाम होणार याची माहिती घेऊनच मार्ग निवडणे गरजेचे, असे विद्या क्लासेस संचालिका अमृता जोशी यांनी सांगितले. या वेळी रामदास राणे, शशिकांत मोदी, निनाद आवटे, विजय चितळे यांनी विद्यार्थ्यांना मार्गदर्शन केले. प्रास्ताविक प्रणाली सावर्डेकर यांनी केले तर सूत्रसंचालन अश्विनी पवार यांनी केले. या वेळी ५४ विद्यार्थ्यांचा सत्कार भाजप पदाधिकारी व कार्यकर्ते यांच्या हस्ते झाला. प्रत्येक प्रभागात असे सत्कार कार्यक्रम घेण्याचा मानस चिपळूण भाजपचा आहे, असे या वेळी जाहीर करण्यात आले.
---