रत्नागिरीत २६ला
डाक अदालत
रत्नागिरी ः येथील अधीक्षक डाकघर कार्यालयात २६ जूनला सकाळी ११ वाजता विभागीय स्तरावरील डाक अदालत आयोजित करण्यात आली आहे. पोस्टाच्या कामासंबंधीच्या ज्या तक्रारींचे निराकरण झाले नसेल व समाधानकारक उत्तर मिळाले नसेल अशा तक्रारींची डाक अदालतीमध्ये दखल घेतली जाणार आहे. विशेषतः टपाल, स्पीड पोस्ट, काऊंटर सेवा, डाक वस्तू पार्सल, बचतबॅंक व मनीऑर्डरबाबतच्या तक्रारी विचारात घेतल्या जातील. डाकसेवेबाबतची तक्रार अधीक्षक डाकघर, विभागीय कार्यालय, रत्नागिरी यांच्या नावे २३ जूनपर्यंत अथवा तत्पूर्वी पोहोचेल, अशा पद्धतीने पाठवावी.

मच्छीमारांसाठी आज
विमा नोंदणी शिबिर
रत्नागिरी ः मत्स्य व्यवसाय विभागाने मच्छीमारांसाठी पावसाळी बंदी कालावधीचे औचित्य साधून अपघात गट विमा व नॅशनल फिशरिज डिजिटल प्लॅटफॉर्म नोंदणी कॅम्प शुक्रवारी (ता. १३) सकाळी दहा वाजता जयगड मच्छीमार सहकारी संस्था, जयगड आणि कालिका मंदिर, काळबादेवी या ठिकाणी घेण्यात येणार आहे. यासाठी आधारकार्डला लिंक असलेला मोबाईल नंबर, आधारकार्ड, पॅनकार्ड, बॅंक पासबुक, वारसाचे आधारकार्ड, पॅनकार्ड, बॅंक पासबुक ही कागदपत्रे आवश्यक आहेत. नौकेवरील परराज्यातील खलाशी तसेच इतर मत्स्य व्यवसायातील इतर कामगारांनीदेखील नोंद करणे आवश्यक आहे. इतर कोणत्याही योजनांचा लभा घेण्यास पात्र व्हाल, असे आवाहन मत्स्य व्यवसाय विकास अधिकारी आनंद पालव यांनी केले आहे.

ओरीत काजूपिकाच्या
लागवडीचे प्रात्यक्षिक
पावस ः रत्नागिरी तालुक्यातील ओरी येथे प्रकाश गोताड यांच्या फळबाग लागवड प्रक्षेत्रावर सीआरए पद्धतीने काजूपिकाची लागवड करण्यात आली. या प्रसंगी उपविभागीय कृषी अधिकारी फिरोज शेख, तालुका कृषी अधिकारी विनोद हेगडे, तंत्र अधिकारी सपकाळ, मंडळ कृषी अधिकारी भुवड आदींनी मार्गदर्शन केले. चाफे येथे चंद्रकांत मांडवकर यांच्या काजू प्रक्रिया युनिटला भेट दिली. ओरी येथे दीपक उपळेकर यांच्या काजू रोपवाटिकेला भेट देऊन मार्गदर्शन करण्यात आले.