70547

मराठी नाट्यसृष्टीपुढील समस्या दूर करू

मंत्री शेलार ः मराठी नाट्य व्यावसायिक निर्माता संघाला ग्वाही

सकाळ वृत्तसेवा
तळेरे, ता. १४ : मनोरंजनाच्या माध्यमातून समाज प्रबोधन करणाऱ्या मराठी नाट्यसृष्टीपुढील समस्या दूर करणे, व्यवहार्य मागण्यांची पूर्तता करणे हे शासन म्हणून आमचे कर्तव्य आहे. हे लक्षात ठेवून आपल्या मागण्यांवर त्वरित कार्यवाही करण्यात येईल, अशी ग्वाही राज्याचे सांस्कृतिक कार्यमंत्री आशिष शेलार यांनी मराठी नाट्य व्यावसायिक निर्माता संघाच्या पदाधिकाऱ्यांना दिली.
मराठी नाट्य व्यावसायिक निर्माता संघाच्या मागण्यांवर चर्चेसाठी श्री. शेलार यांनी सोमवारी पु. ल. देशपांडे कला अकादमी प्रभादेवी येथे विशेष बैठक आयोजित केली होती. या बैठकीला संस्थेचे उपाध्यक्ष ज्ञानेश महाराव, प्रमुख कार्यवाह राहुल भंडारे व सहकार्यवाह श्रीकांत तटकरे, सांस्कृतिक कार्य विभागाचे अपर मुख्य सचिव विकास खारगे, सांस्कृतिक कार्य संचालनालयाचे सहसंचालक श्रीराम पांडे, पु. ल. देशपांडे कला अकादमी संचालक मीनल जोगळेकर आदी उपस्थित होते.
----
संघाने केलेल्या काही मागण्या
या बैठकीत नाट्यनिर्माता संघ पदाधिकाऱ्यांनी सर्व नाट्य निर्मात्यांच्या नाटकाचे नेपथ्य व अन्य साहित्य एकाच जागी ठेवण्यास गोदामासाठी जागा मिळावी, नाटकाच्या साहित्याची व रंगकर्मीची वाहतूक करणाऱ्या बस व पार्किंगसाठी गोदामाजवळच जागा मिळावी, नवीन नाट्यनिर्मितीसाठी मिळणाऱ्या अनुदानात भरघोस वाढ व नियमावलीत बदल व्हावा, नाट्य निर्मात्यांना निवासासाठी सवलतीच्या दरात सिडकोच्या सदनिका उपलब्ध करून द्याव्यात आदी प्रमुख मागण्या सादर करण्यात आल्या. या मागण्यांबाबत शेलार यांनी सकारात्मक प्रतिसाद दिला.