70594

बुद्धिबळ स्पर्धेत मुक्ताई अॅकॅडमीचा ठसा

सांगलीतील आंतरराष्ट्रीय स्पर्धा; बारा विद्यार्थ्यांचे विविध गटांमध्ये यश

सकाळ वृत्तसेवा
सावंतवाडी, ता. १४ ः सांगली येथील नूतन बुद्धिबळ मंडळाने (कै.) बाबुकाका शिरगावकर आंतरराष्ट्रीय रॅपिड रेटिंग बुद्धिबळ स्पर्धेचे आयोजन केले होते. या स्पर्धेत दोनशे सव्वीस खेळाडूंनी सहभाग घेतला. सिंधुदुर्ग जिल्ह्यातील सावंतवाडी येथील मुक्ताई ॲकॅडमीचे बाळकृष्ण पेडणेकर, विभव राऊळ, मयुरेश परुळेकर, यथार्थ डांगी, पुष्कर केळूसकर, चिदानंद रेडकर, हर्ष राऊळ, पार्थ गावकर, विराज दळवी, यश सावंत, गार्गी सावंत, मानस सावंत या बारा विद्यार्थ्यांनी या स्पर्धेत सहभाग घेतला.
जिल्ह्यातील आघाडीचा राष्ट्रीय खेळाडू बाळकृष्ण पेडणेकर आणि चौदा वर्षीय राष्ट्रीय खेळाडू विभव राऊळ या सिंधुदुर्ग जिल्ह्यातील दोन खेळाडूंनी उत्कृष्ट खेळ करून स्पर्धेत अनुक्रमे अठरावा आणि चोवीसावा क्रमांक पटकावला. या दोघांनी नऊ राऊंडमध्ये प्रत्येकी सहा गुण प्राप्त केले. ॲकॅडमीचा ५० टक्के दृष्टीदोष असलेला मालवण येथील एकोणीस वर्षीय राष्ट्रीय खेळाडू मयुरेश परुळेकर याने पाच गुण करून गटात द्वितीय क्रमांक पटकावला. चौदा वर्षीय राष्ट्रीय खेळाडू यथार्थ डांगी याने पाच गुण करून तेरा वर्षांखालील गटात चौथा क्रमांक पटकावला. ॲकॅडमीचा १३ वर्षीय विद्यार्थी पुष्कर केळुसकर याने दुसऱ्याच रॅपिड रेटिंग स्पर्धेत सहभाग घेऊन आंतरराष्ट्रीय रेटिंग मिळविले. त्याने दोन रेटेड खेळाडूंना हरवून आणि एक रेटेड खेळाडूसोबत बरोबरी करून साडेचार गुणांची कमाई केली.
मुक्ताई ॲकॅडमीचे अध्यक्ष व प्रशिक्षक कौस्तुभ पेडणेकर आणि राष्ट्रीय प्रशिक्षक उत्कर्ष लोमटे यांच्या मार्गदर्शनखाली या विद्यार्थ्यांनी हे यश मिळविले. युवराज लखमराजे भोसले यांनी यशस्वी विदयार्थ्यांचे अभिनंदन केले. ॲकॅडमीचे सर्व विदयार्थी आणि कौस्तुभ पेडणेकर यांचे कौतुक करून पुढील वाटचालीसाठी शुभेच्छा दिल्या.