70689

घरफोडीतील संशयित गोकर्णमध्ये ताब्यात

कलमठचे प्रकरण ः सीसीटीव्ही फुटेजमुळे चोराचा माग

सकाळ वृत्तसेवा
कणकवली, ता. १५ ः शहरालगतच्या कलमठ येथे घरफोडी करून सोन्याच्या दागिन्यांसह रोकड असा एक लाख ७३ हजारांच्या ऐवजासह पसार सराईतास पोलिसांनी शनिवारी (ता. १४) गोकर्ण-कर्नाटक येथून ताब्यात घेतले. सराईत गुन्हेगार सचिन राजू माने ऊर्फ लखन अशोक कुलकर्णी (पंढरपूर, जि. सोलापूर) असे त्याचे नाव आहे. जिल्हा स्थानिक गुन्हे अन्वेषण आणि कणकवली पोलिस ठाण्याच्या संयुक्त पथकाने ही कारवाई केली.

पोलिसांनी दिलेल्या माहितीनुसार, कलमठ बिडयेवाडी येथे २ जून रोजी पहाटे साडेतीनच्या सुमारास कुलूपबंद असलेल्या चार बंगल्यांमध्ये घरफोडी झाली होती. दरम्यान, ही चोरी सीसीटीव्ही कॅमेऱ्यात रेकॉर्ड झाली होती. संजय सुभाष सावंत यांनी दिलेल्या फिर्यादीनुसार, सोन्या-चांदीचे दागिने व रोकड असा १ लाख ७३ हजार ७०० रुपयांचा ऐवज चोरीस गेला होता. या गुन्ह्याचा तपास पोलिस अधीक्षक डॉ. मोहन दहिकर, अतिरिक्त अधीक्षक कृषिकेश रावले यांच्या मार्गदर्शनाखाली एलसीबी पोलिस निरीक्षक सचिन हुंदळेकर, कणकवली निरीक्षक मारुती जगताप यांच्या नेतृत्वात उपनिरीक्षक अनिल हडळ, उपनिरीक्षक आर. बी. शेळके, हवालदार श्री. गंगावणे यांच्या पथकाने ही कारवाई केली.
कलमट घरफोडी गुन्ह्याच्या तपासासाठी घटनास्थळी पाहणी केल्यानंतर संशयिताचे सीसीटीव्ही फुटेज हाती लागले होते. संशयिताने घटनास्थळी केलेला वावर आणि सापडलेल्या विविध वस्तूंवरून या पथकाने बारकाईने अभ्यास केला होता. त्यानंतर रेकॉर्डवरील काही संशयितांची तपासणी केली होती. यात संशयित सचिन राजू माने याने हा गुन्हा केल्याचा अंदाज वर्तविण्यात आला. त्यानंतर एलसीबी आणि कणकवली पोलिसांच्या पथकाने गोपनीय माहिती आणि नातेवाइकांकडून मिळालेल्या माहितीच्या आधारावर शोध घेण्यास सुरुवात केली. समांतर तपासामध्ये संशयिताचे वास्तव्य हे कर्नाटकातील गोकर्ण येथे आढळले. तांत्रिक विश्लेषणाद्वारे त्याची माहिती गोळा केल्यानंतर सिंधुदुर्ग पोलिस पथकाने १४ जूनला कर्नाटकात जाऊन संशयित सचिन ऊर्फ राजू मानेला ताब्यात घेतले. त्याच्याकडे प्राथमिक चौकशीमध्ये गुन्ह्याची कबुली मिळाली आहे. याबाबत त्याला न्यायालयात हजर केले जाणार आहे.