70733

जिल्ह्यात कुशल कारागीर घडविणार

प्रभाकर सावंत ः सिंधुदुर्गनगरीतील प्रशिक्षण इमारत सज्ज

सकाळ वृत्तसेवा
ओरोस, ता. १५ ः समाजात सध्या सुतारकाम आणि गवंडी, प्लंबर यांना मोठ्या प्रमाणात मागणी आहे. त्यातील सुतारकाम आणि गवंडी या कामांत जर कलात्मकता असेल तर कारागिरांना मोठी मागणी असते. नेमके हेच हेरून सिंधुदुर्गनगरी येथे सुरू केलेल्या कौशल्य विकास प्रशिक्षण संस्थेत याबाबत प्रशिक्षण तज्ज्ञ मार्गदर्शकांकडून दिले जात आहे. राहणे आणि जेवणासह मोफत शिक्षण येथे दिले जात असून वर्षाला २० प्रशिक्षणार्थी घडविले जाणार आहेत. याचा जिल्ह्यातील नागरिकांनी लाभ घ्यावा, असे आवाहन भाजप जिल्हाध्यक्ष प्रभाकर सावंत यांनी केले.
केंद्राच्या कौशल्य विकास योजनेच्या धर्तीवर जिल्ह्याचे माजी पालकमंत्री रवींद्र चव्हाण यांच्या संकल्पनेतून सिंधुदुर्गनगरी येथील ओरोस हायस्कूल नजीक प्रशिक्षण देण्यासाठी सुसज्ज इमारत उभारली आहे. यासाठी लागणारी यंत्रसामग्री जिल्हा परिषदेने उपलब्ध केली आहे, तर कसाल शिक्षण संस्था, भगीरथ प्रतिष्ठान आणि ‘कॉस्ट टू कनेक्ट’ या संस्थांच्या माध्यमातून ही प्रशिक्षण संस्था चालविली जात आहे. याबाबत माहिती देण्यासाठी सावंत यांनी प्रशिक्षण संस्थेत पत्रकार परिषद आयोजित केली होती. यावेळी भगीरथ प्रतिष्ठान संस्थेचे अध्यक्ष डॉ. प्रसाद देवधर, कॉस्ट टू कनेक्ट संस्थेचे तज्ज्ञ प्रशिक्षक अनिल बनसोड, व्यवस्थापक सूचित भोजने आदी उपस्थित होते.
---------
प्रशिक्षणार्थ्यांकडून आकर्षक साहित्य
श्री. सावंत म्हणाले, ‘‘सध्या संस्थेत सहा प्रशिक्षणार्थी सुतारकामाचे प्रशिक्षण घेत आहेत. ते आता स्वतः साहित्य बनवू लागले आहेत. खुर्च्या, टेबल, मोबाईल स्टँड, पेपरवेट, बसण्याचा पाट आदी साहित्य त्यांनी बनवायला सुरुवात केली आहे. हे साहित्य त्यांनी आकर्षक बनविले आहे. याशिवाय प्रशिक्षण इमारतीत डिझाईन करून इमारत सजवित आहेत; मात्र प्रशिक्षणार्थी संख्या वाढली पाहिजे, यासाठी आमचा प्रयत्न आहे.
--------
किमान २० विद्यार्थी प्रशिक्षित व्हावेत!
श्री. सावंत म्हणाले, ‘‘वर्षाला किमान २० विद्यार्थी येथून प्रशिक्षित व्हायला हवेत, असा आमचा मानस आहे. यातून जिल्ह्याला कुशल सुतार, गवंडी आणि प्लंबर उपलब्ध होणार आहेत. येथे निर्माण होणारे कारागीर कुशल असल्याने भविष्यात जिल्ह्याच्या बाहेरून कारागीर मागविण्याची गरज पडणार नाही. प्रशिक्षण पूर्णतः मोफत असून राहणे आणि जेवणाची मोफत व्यवस्था केली आहे. जिल्ह्यातील दहावी, बारावी झालेल्या नागरिकांनी व्यावसायिक होण्यासाठी हे प्रशिक्षण घेण्यासाठी पुढे यावे.’’