71039
71040

प्रवेशोत्सवाची गुढी अन् किलबिलाट

बांदा केंद्रशाळा ः नवविद्यार्थ्यांचे औक्षण, दुचाकी रॅलीही लक्षवेधी

सकाळ वृत्तसेवा
बांदा, ता. १६ ः प्रदीर्घ उन्हाळी सुटीनंतर आज पीएम श्री जिल्हा परिषद बांदा क्र. १ केंद्रशाळेत शाळा प्रवेशोत्सव कार्यक्रम मोठ्या उत्साहात झाला. यावेळी शाळा प्रवेशोत्सवाची गुढी उभारून दुचाकी रॅली, पायांचे ठसे व झाडांचे रोप देऊन नव विद्यार्थ्यांचे स्वागत करण्यात आले.
शाळा व्यवस्थापन समिती अध्यक्ष रत्नाकर आगलावे यांच्या अध्यक्षतेखाली झालेल्या या कार्यक्रमाला बांदा सरपंच प्रियांका नाईक, शाळा व्यवस्थापन समिती उपाध्यक्षा संपदा सिद्ध्ये, सदस्य हेमंत मोर्ये, संतोष बांदेकर, श्रद्धा नार्वेकर, मुख्याध्यापक शांताराम असनकर आदी उपस्थित होते. मान्यवरांच्या उपस्थितीत झालेल्या कार्यक्रमात विद्यार्थ्यांचे उत्साहात स्वागत करण्यात आले. सुरुवातीला विद्यार्थ्यांना कोल्हापुरी फेटे बांधून बांदा बाजारपेठेतून विद्यार्थ्यांची काढलेली दुचाकी रॅली लक्षवेधी ठरली. यावेळी विद्यार्थ्यांचे शाळेच्या गेटवर मिकीमाऊसने अभिवादन करून स्वागत केले‌. यावेळी विद्यार्थ्यांवर‌ पुष्पवृष्टी करून औक्षण केले‌ व झाडांचे रोप व गुलाबपुष्प देऊन विद्यार्थ्यांचा शाळा प्रवेशोत्सव करण्यात आला. या दिवशी शाळेसमोर प्रवेशोत्सवाची गुढी उभी केली होती. शाळेत पहिलीत नव्याने दाखल झालेल्या विद्यार्थ्यांच्या पायाचे ठसे उमटवून विद्यार्थ्यांच्या पालकांना देण्यात आले. पहिल्या दिवशी शाळेत दाखल झालेल्या विद्यार्थ्यांना मोफत पाठ्यपुस्तके, गणवेश, बूट व मोजे यांचे वितरण केले. दुपारच्या जेवणात विद्यार्थ्यांना शाळा व्यवस्थापन समितीच्या उपाध्यक्षा संपदा सिद्ध्ये यांच्या सौजन्याने गोड जेवण देण्यात आले. शाळा प्रवेशोत्सव यशस्वी होण्यासाठी पदवीधर शिक्षक उदय सावळ, जे. डी. पाटील, रंगनाथ परब, फ्रान्सिस फर्नांडिस, शुभेच्छा सावंत, स्नेहा घाडी, जागृती धुरी, मनीषा मोरे‌, कृपा कांबळे, सुप्रिया धामापूरकर‌ यांनी परिश्रम घेतले. यावेळी बांदा गावातील सर्व अंगणवाडी सेविका, तसेच मान्डेलीझ कंपनीच्या सहकार्याने बालरक्षा भारत या संस्थेतर्फे ईट राईट संस्थेच्या कर्मचाऱ्यांचे सहकार्य लाभले.