71267

अपेक्षित यशासाठी ध्येय निश्चित करा

मच्छिंद्र सुकटे ः माड्याचीवाडी शाळेत विद्यार्थ्यांना मार्गदर्शन

सकाळ वृत्तसेवा
कुडाळ, ता. १७ ः निवासी उपजिल्हाधिकारी मच्छिंद्र सुकटे यांनी जिल्हा परिषद माड्याचीवाडी प्राथमिक शाळेत पहिली ते सातवीच्या वर्गावर जाऊन मुलांना अभ्यासाचे धडे दिले. मी सुद्धा जिल्हा परिषद शाळेत शिकलो असून भविष्यात विद्यार्थ्यांनी स्पर्धात्मक युगात वाटचाल करताना ध्येय निश्चित करावे, असे प्रतिपादन त्यांनी केले.
शंभर शाळांना भेटी देणे उपक्रमाअंतर्गत निवासी जिल्हाधिकारी सुकटे यांनी जिल्हा परिषद पूर्ण प्राथमिक शाळा माड्याचीवाडी येथे भेट दिली. यावेळी सरपंच विघ्नेश गावडे, माजी सरपंच सचिन गावडे, मंडळ अधिकारी श्वेता दळवी, तलाठी सोनवणे, ग्रामविकास अधिकारी कृष्णा पेडणेकर, मुख्याध्यापक जयराम गोसावी, ऋचा कर्पे, शंकर पेडणेकर, ग्रामपंचायत सदस्या काशिबाई कोरगावकर, शाळा व्यवस्थापन कमिटी अध्यक्ष संदीप गावडे, सदस्य अंजनी कमतनुरे, भूपेंद्र परब, ग्रामस्थ व पालक वर्ग, ग्रामपंचायत सदस्य, शिक्षक, शाळा व्यवस्थापन समिती पदाधिकारी, पालक, विद्यार्थी उपस्थित होते
श्री. सुकटे म्हणाले, ‘‘आजचे युग स्पर्धात्मक आहे. स्पर्धात्मक युगात वाटचाल करताना विद्यार्थ्यांनी जिद्द, चिकाटी, मेहनत आणि आत्मविश्वास या गुणांच्या जोरावर वाटचाल करावी. भविष्यात कोण बनणार, याबाबत आताच निश्चित करा. मी स्वतः जिल्हा परिषद शाळेत शिकून इथपर्यंत पोहोचलो आहे. तशाचप्रकारे या ग्रामीण भागातील विद्यार्थ्यांनी आपल्या आवडीनुसार विविध क्षेत्रात वाटचाल करावी.’’
दरम्यान, पहिली ते सातवी या शाळेत पाच शिक्षक होते. सध्या तीन शिक्षक असून दोन शिक्षक मिळावेत, अशी मागणी यावेळी सरपंच गावडे यांनी सुकटे यांच्याकडे केली. इतर शैक्षणिक प्रश्नांबाबत चर्चा करण्यात आली.