rat17p25.jpg-
71276
गावतळे ः देगाव येथे विजेचा खांब उभा करताना महावितरणचे कर्मचारी.
----------
देगाव येथील वीजपुरवठा ९ तासात पूर्ववत
महावितरण ; पावसात पडलेले तीन खांब केले उभे
सकाळ वृत्तसेवा
गावतळे, ता. १७ ः दापोली तालुक्यातील देगाव महावितरण उपकेंद्राच्या परिसरात ३३ केव्ही वाहिनीवर पडलेले तीन खांब ९ तासात उभे करत वीजप्रवाह पूर्ववत केल्याने अधिकारी व कर्मचारी यांचे कौतुक होत आहे.
१६ जूनला पहाटे जोरदार वारा आणि पावसामुळे देगाव येथील महावितरण उपकेंद्राच्या बाजूला असलेल्या कुणबी भवनच्यामागे ३३ केव्ही वाहिनीवरील तीन खांब पडले होते. त्यापैकी दोन मोठे तर एक लहान खांब होता. मुख्य वीजपुरवठा करणारी लाईन बंद झाल्याने ३२ गावातील वीजपुरवठा खंडित झाला होता. देगाव येथे कार्यरत असलेले सहाय्यक अभियंता सिद्धारूढ तेवरे यांनी पहाटे ६ वाजता माहिती मिळाल्यानंतर सर्व वायरमन आणि लाईनमन यांना फोन करून माहिती दिली. तसेच ठेकेदारांना मदतीसाठी बोलावून घेतले. सकाळी ८ वाजता महावितरणचे ९ कर्मचारी आणि ठेकेदाराची माणसे यांनी काम सुरू केले. दोन खांब जंगलमय भागात होते तर एक खांब सपाट भागात होता. पाऊस दमदार पडत असूनही हे कर्मचारी अविरत काम करत होते. सकाळी ८ वाजल्यापासून झाडी तोडून पडलेले जुने मोठे दोन खांब आणि एक नवीन खांब उभे करून दुपारी साडेचार वाजता वीजपुरवठा पूर्ववत केला. या परिसरातील नागरिकांनी महावितरणचे अधिकारी, कर्मचाऱ्यांचे प्रत्यक्ष भेटून अभिनंदन केले. यासाठी वाकवली येथील उपअभियंता परेश सागवेकर, उपकार्यकारी अधिकारी नीलेश भेंडाळे यांनीही मेहनत घेतली.