राजापुरात उड्डाणपुलावरून
दुहेरी वाहतूक सुरू
राजापूर, ता. १७ ः शहरातील एसटी आगारासमोरील उड्डाणपुलाच्या एका बाजूकडील रखडलेले काम पूर्ण होऊन पुलाच्या दोन्ही बाजूने वाहतूक सुरू होण्यासाठी माजी नगराध्यक्ष अ‍ॅड. जमीर खलिफे आणि भाजपचे अरविंद लांजेकर यांनी केलेल्या प्रयत्नांना अखेर यश आले आहे. त्यांच्या प्रयत्नातून उड्डाणपुलावरून दुहेरी वाहतूक सुरू झाल्याने वाहनचालकांसह प्रवाशांमधून समाधान व्यक्त केले जात आहे.
महामार्गावरील राजापूर हद्दीतील बहुतांश कामे पूर्ण झाली आहेत. आगारासमोरील उड्डाणपुलाच्या एका बाजूकडील काम रखडले होते. त्यामुळे एका बाजूने वाहतूक सुरू होती. पुलाच्या एका बाजूने जाणारी व येणारी वाहने मार्गक्रमण करत असल्याने अपघाताचा धोका होता. अ‍ॅड. खलिफे आणि लांजेकर यांनी महामार्ग विभागाकडे त्यासाठी पाठपुरावा केला होता. गेल्या महिन्यात उड्डाणपुलाचे रखडलेले काम सुरू करण्यात आले. त्यावेळी राष्ट्रीय महामार्ग विभागाचे कनिष्ठ अभियंता कुमावत यांनी कामाची पाहणी केली. आमदार किरण सामंत यांनी काही दिवसांपूर्वी महामार्गाची पाहणी करत तत्काळ उड्डाणपुलाच्या दोन्ही बाजूने वाहतूक सुरू करण्याच्या सूचना दिल्या होत्या. त्यानुसार उड्डाणपुलाच्या दुसऱ्‍या बाजूनेही वाहतूक सुरू करण्यात आली.