शैक्षणिक शिष्यवृत्तीसाठी
ऑनलाईन अर्जांचे आवाहन
बांदा, ता. १८ ः सुभद्राबाई शिक्षण निधी मुलुंड-मुंबई यांच्या विद्यमाने आणि कोकण कला व शिक्षण विकास संस्था यांच्या माध्यमातून आर्थिकदृष्ट्या दुर्बल विद्यार्थ्यांना आर्थिक वर्ष २०२५-२६ साठी शैक्षणिक शिष्यवृत्ती मिळण्याबाबत ऑनलाईन अर्ज करण्याचे आवाहन करण्यात आले आहे. गेल्या आर्थिक वर्षात सिंधुदुर्ग आणि रत्नागिरी जिल्ह्यांतील ४०० हुन अधिक विद्यार्थी व विद्यार्थिनींना संस्थेच्या माध्यमातून शिष्यवृत्ती देण्यात आली आहे. ही शिष्यवृत्ती केवळ रत्नागिरी व सिंधुदुर्ग जिल्ह्यांतील विद्यार्थ्यांसाठी असून दहावी उत्तीर्ण होऊन सरकारमान्य अशा कोणत्याही अभ्यासक्रमास प्रवेश घेतलेल्या ६० टक्केपेक्षा जास्त गुण असलेल्या कोणत्याही विद्यार्थ्याला मिळू शकते. ऑनलाईन अर्ज करण्यासाठी पावती, मागील वर्षाची गुणपत्रिका, कुटुंबाची शिधा पत्रिका, उत्पन्नाचा दाखला, शाळेच्या दोन शिक्षकांच्या हस्ताक्षरातील साक्षांकृत शाळेच्या लेटरहेडवरील शिफारस पत्रे आणि विद्यार्थ्यांचे आधार कार्ड पीडीएफ फॉरमॅटमध्ये तयार असणे आवश्यक आहे. अर्ज पाठविण्याची अंतिम तारीख ३० सप्टेंबर आहे. अर्जांची छाननी झाल्यावर प्राथमिक निवड झालेल्यांना मुलाखतीसाठी बोलाविले जाईल. मुलाखतीनंतर अंतिम निवड करून शिष्यवृत्ती मिळालेल्या विद्यार्थ्यांना ई-मेलने तसे कळवून त्यानंतर त्यांच्या बँक खात्यामध्ये शिष्यवृत्ती धनादेशाने जमा केली जाईल, अशी माहिती कोकण संस्थेचे अध्यक्ष दयानंद कुबल यांनी दिली. जास्तीत जास्त गरजू विद्यार्थ्यांनी या संधीचा फायदा घ्यावा. अधिक माहितीसाठी कोकण संस्थेच्या माणगाव (ता. कुडाळ) कार्यालयात कागदपत्रांसह भेट द्यावी किंवा संकेतस्थळावर अर्ज भरावा, असे आवाहन संस्थेने केले आहे.