‘कृष्णा अँटिऑक्सिडंट’च्या
८२ कर्मचाऱ्यांचे रक्तदान
सकाळ वृत्तसेवा
चिपळूण, ता. १९ ः कृष्णा अँटिऑक्सिडंट कंपनीच्या ८२ कर्मचाऱ्यांनी स्थापनादिनी सामूहिक रक्तदान केले. केवळ औपचारिक शिबिरापुरतेच न थांबता कंपनीने १०० रक्तदात्यांची ‘आपत्कालीन मदतीसाठी सज्ज’ अशी यादीही तयार केली आहे. या यादीतील कर्मचारी आवश्यकतेनुसार, तातडीने रक्तदानासाठी उपलब्ध राहतात.
कंपनीने तयार केलेल्या यादीचा फायदा कऱ्हाड कृष्णा हॉस्पिटल येथे उपचार घेत असलेल्या चिपळूण येथील घाडगे नावाच्या रुग्णाला झाला. त्याला तातडीने रक्ताची गरज होती. रुग्णाच्या नातेवाईकांनी कंपनीचे एचआर प्रमुख सुयोग चव्हाण यांच्याशी संपर्क साधला. त्यांनी वरिष्ठ अधिकारी अशोक पाटील यांच्या मार्गदर्शनाखाली शिराळा युनिटमधील अधिकारी विजयकुमार पाटील आणि सुरक्षाप्रमुख आबासाहेब आवटी यांच्या मदतीने कर्मचाऱ्यांशी समन्वय साधला. त्यामुळे दीपक पाटील, ऋतुराज पाटील, संग्राम हुजरे, अनिकेत कानसे व पंडित या पाच कर्मचाऱ्यांना रक्तदानासाठी तत्काळ कऱ्हाडला पाठवले. या तत्परतेमुळे रुग्णावर योग्य उपचार वेळेत होऊ शकले. रुग्णाच्या कुटुंबीयांनी कंपनीच्या या सामाजिक सेवेसाठी कृतज्ञता व्यक्त केली. या उपक्रमात शहरप्रमुख उमेश सकपाळ आणि ब्लडलाईन संस्थेचे अमोल टाकळे यांचेही मोलाचे सहकार्य लाभले.