- rat२०p६.jpg-
P२५N७१८६८
श्री क्षेत्र मार्लेश्वर

भाविकांनी परंपरेला साजेसा पेहरावा करावा
श्री मार्लेश्वर देवस्थान विश्वस्त ः मंदिर सायंकाळी सातपर्यंत खुले
सकाळ वृत्तसेवा
देवरूख, ता. २० ः श्री क्षेत्र मार्लेश्वर येथे येणाऱ्या भाविकांनी हिंदू परंपरेला साजेसा, सुसंस्कृत असा पेहराव परिधान करावा, जेणेकरून श्री स्वयंभू महादेवाचे दर्शन घेताना मंदिर परिसरातील वातावरणात आपल्याला लाभलेला सांस्कृतिक वारसा व मंदिर परिसराचे पावित्र्य टिकवले जाईल. भाविकांनी अंगभर वस्त्र परिधान करूनच श्री स्वयंभू मार्लेश्वराचे दर्शन घ्यावे, असे आवाहनही श्री मार्लेश्वर देवस्थान समितीकडून करण्यात आले आहे.
पावसाळ्यात श्री क्षेत्र मार्लेश्वर पर्यटनस्थळी येणाऱ्या सर्व भाविकांची सुरक्षितता लक्षात घेता श्री मार्लेश्वर मंदिर समितीने श्री देव मार्लेश्वर दर्शनाची वेळ निश्चित करण्याचा निर्णय घेतला आहे. मंदिर सकाळी ७ ते सायंकाळी ७ वाजेपर्यंत भाविकांसाठी खुले राहील तसेच श्री देव मार्लेश्वराचे श्रावणी सोमवार अथवा वार्षिक धार्मिक विधी उत्सवावेळी त्या त्या वेळी योग्य निर्णय घेऊन मंदिर भाविकांसाठी जास्त कार्यकाळ खुले राहील तसेच श्री क्षेत्र मार्लेश्वर देवस्थानासंबंधी धार्मिक व भौगोलिक माहिती देताना किंवा घेताना ती देवस्थानचे अधिकृत विश्वस्त व देवस्थान समिती यांच्याकडून घेऊन ती प्रकाशित करावी. तसेच देवस्थान समितीव्यतिरिक्त इतरांनी दिलेली माहितीची खातरजमा न करता सोशल मीडियाद्वारे चुकीची प्रसारित करू नये, असे आवाहन करण्यात आले आहे.
---
श्रावणाची तयारी सुरू
श्री क्षेत्र मार्लेश्वर मंदिरात श्रावण सोमवारी राज्यभरातून भाविक दर्शनासाठी येत असतात. श्रावण महिन्यात होणाऱ्या सोहळ्याच्या अनुषंगाने तयारी मंदिर व्यवस्थापनाकडून सुरू करण्यात आली आहे.