swt2419.jpg
72830
वाडा ः येथील कला शिक्षण कार्यशाळेचा प्रारंभ विविध मान्यवरांच्या उपस्थितीत झाला.

विद्यार्थ्यांनो, कला शिक्षणातून विकास साधा
निरंजन दीक्षितः वाडा हायस्कूलमध्ये कला शिक्षण कार्यशाळा उत्साहात
सकाळ वृत्तसेवा
देवगड, ता. २४ ः तालुक्यातील वाडा येथील अ. कृ. केळकर हायस्कूलमध्ये कला शिक्षण कार्यशाळेचे आयोजन करण्यात आले. विविध मान्यवरांच्या उपस्थितीत त्याचा प्रारंभ झाला. कला शिक्षणातून विद्यार्थ्यांनी स्वतःचा विकास साधावा, असे आवाहन दीक्षित फाउंडेशनचे संस्थापक निरंजन दीक्षित यांनी यावेळी केले.
मंचावर प्रमुख अतिथी म्हणून श्री. दीक्षित यांच्यासह उद्घाटक म्हणून वाडा केंद्राचे केंद्रप्रमुख जयदेव सारंग, शाला समिती अध्यक्ष हर्षद जोशी, मुख्याध्यापक सुनील घस्ती, स्थानीय समिती सदस्य विश्वजित सातवळेकर, माजी मुख्याध्यापक नारायण माने, शाळा समिती सदस्य महेंद्र मांजरेकर, माजी पर्यवेक्षिका उल्का जोशी, विष्णू वेलणकर तर कार्यक्रमाच्या अध्यक्षस्थानी स्थानीय समिती अध्यक्ष शांताराम पुजारे होते. राष्ट्रीय शिक्षण धोरण २०२० ला अनुसरून व्यावसायिक शिक्षण देण्याच्या हेतूचा पाया या कार्यशाळेतून घातला गेला. वाडा हायस्कूलसोबतच अन्य प्रशालेच्या विद्यार्थ्यांनाही या कार्यशाळेत समाविष्ट करून घेतले जाणार आहे.
श्री. दीक्षित यांनी, विद्यार्थ्यांनी २१ व्या शतकात स्वतःचा विकास साधणे आवश्यक आहे. यासाठीच या कार्यशाळेसाठी प्रायोजकत्व दिले आहे. यातून विद्यार्थ्यांनी स्वतःचा व पर्यायाने गावाचा विकास साधावा, असे आवाहन केले. हर्षद जोशी यांनी, शाळा समूहसारखी बंद पडलेली योजना या कार्यशाळेतून पुन्हा ऊर्जितावस्थेत आणत असल्याचे सांगत विद्यार्थ्यांनी या कार्यशाळेला सकारात्मक प्रतिसाद द्यावा, असे आवाहन केले. जयदेव सारंग यांनी, अशा प्रकारच्या कार्यशाळांची गरज असल्याचे मत व्यक्त करत वाडा हायस्कूलने हा आदर्श घालून दिला आहे, असे सांगितले. कार्यशाळेसाठी पौर्णिमा केरकर, हर्षद जोशी यांनी मेहनत घेतली. सूत्रसंचालन भूषण दातार यांनी केले. स्मिता तेली यांनी आभार मानले.