सिंधुदुर्गातील रक्तदात्यांचे
गोव्यात तातडीचे रक्तदान

सकाळ वृत्तसेवा
सावंतवाडी, ता. २८ ः ऑन कॉल रक्तदाते संस्थेच्या रक्तदात्यांनी मंगळवारी (ता. २४) गोवा बांबोळी येथे दाखल झालेल्या तीन गंभीर रुग्णांना तातडीने रक्तदान करून जीवनदान दिले. त्यांच्या कार्याचे कौतुक होत आहे.
तुळस (ता. वेंगुर्ले) येथील प्रल्हाद राणे यांना शस्त्रक्रियेसाठी तुलनेने कमी उपलब्ध असलेला एबी पॉझिटिव्ह रक्तगट असलेले चार युनिट रक्त तत्काळ हवे होते. ‘ऑन कॉल रक्तदाते’ संस्थेचे नियमित रक्तदाते आनंद देसाई (बांदा) यांनी तातडीने रक्तपेढी गाठून रक्तदान केले. तालुक्यातील कास येथील देविदास पंडित यांना बायपास शस्त्रक्रियेसाठी रक्तदात्यांची आवश्यकता होती. संस्थेचे ‘ऑन कॉल रक्तदाते’ अमोल परब (शिरशिंगे), प्रशांत निरवडेकर (निरवडे) आणि हर्षद मोर्जे (वेंगुर्ले) यांनी सरसावत रक्तदान केले. यामुळे पंडित यांना वेळेवर रक्त उपलब्ध झाले. मातोंड (ता. वेंगुर्ले) येथील सावित्री परब यांना रुग्णालाही तातडीने रक्ताची गरज होती. मातोंडचेच देवेश परब आणि सांगेलीचे अमित जडये या दोघांनी रक्तपेढीमध्ये जाऊन रक्तदान केले. या तिन्ही रुग्णांच्या नातेवाइकांनी सर्व रक्तदात्यांचे आणि ऑन कॉल रक्तदाते संस्थेचे आभार मानले. ऑन कॉल रक्तदाते संस्था सिंधुदुर्ग ही संस्था निवृत्त पोलिस उपअधीक्षक दयानंद गवस यांच्या मार्गदर्शनाखाली रक्तदानातून जीवदानाचे काम करत असून, या कार्याचे सर्वस्तरातून कौतुक केले जात आहे.