73994

भाजी घ्या भाजी, ताजी ताजी रानभाजी!

खुडी शाळेचे प्रांगण दुमदुमले; रानभाजी विक्री, प्रदर्शनास प्रतिसाद

सकाळ वृत्तसेवा
मुणगे, ता. २९ ः ‘‘भाजी घ्या भाजी, ताजी ताजी रान भाजी, फोडशी, कुर्डू, अळू, शेवग्याचा पाला, पेवा, भारंगी, टाकळा, सुरण, कुड्याच्या शेंगा, फागली १० रुपयांना २ जुड्या, २० ला ४ जुड्या,’’ अशा आरोळ्यांनी आज सकाळी खुडी शाळेचे प्रांगण दुमदुमून गेले. निमित्त होते रानभाजी महोत्सवाचे. त्यानिमित्ताने आयोजित रानभाजी विक्री व प्रदर्शनात विद्यार्थ्यांनी उत्स्फूर्त सहभाग घेतला.
खुडी (ता. देवगड) येथील जिल्हा परिषद प्राथमिक शाळा क्र.१ मध्ये दरवर्षीप्रमाणे याही वर्षी शनिवारी (ता. २८) रानभाजी महोत्सवाचे आयोजन केले होते. मुलांनी परिसरातील उपलब्ध विविध पालेभाज्या, रानभाज्या, गावठी भाज्या विकण्यासाठी दुकाने थाटली होती. खुडी पंचक्रोशीतील नागरिकांनी मोठ्या संख्येने उपस्थित राहून रानभाज्यांची मुलांकडून खरेदी केली. आपली भाजी विकण्यासाठी मुलांची चाललेली धडपड पाहण्यासारखी होती. यातून मुलांना व्यवहारातील विविध संकल्पनांची ओळख होण्यास मदत झाली. आपल्या परिसरात सहज उपलब्ध होणाऱ्या रानभाज्या, अपरिचित रानभाज्या, रानभाज्यांचे पौष्टिक मूल्य व महत्त्व, कमीत कमी खर्चात उपलब्धता यांची विद्यार्थ्यांना माहिती मिळाली. या महोत्सवाला कोटकामते केंद्रप्रमुख रमेश राठोड यांनी भेट देऊन विद्यार्थ्यांचे कौतुक केले. खुडी सरपंच दीपक कदम, उपसरपंच तथा शाळा व्यवस्थापन समिती अध्यक्ष नीलेश कामतेकर, उपाध्यक्ष मृण्मयी आरेकर, सदस्य शशिकांत कावले, सर्व शाळा व्यवस्थापन समिती सदस्य, तंटामुक्ती समिती अध्यक्ष अनंत वायंगणकर, श्री. जगदाळे अंगणवाडी सेविका श्रीमती धुरी शुभेच्छा दिल्या. खुडी ग्रामस्थ व शाळेच्या माजी विद्यार्थ्यांनी महोत्सवास भेट देऊन शुभेच्छा देत भाजी पाला व इतर वस्तू खरेदी केली. उपक्रमाच्या यशस्वीतेसाठी खुडी शाळेच्या मुख्याध्यापिका विनिता दुखंडे, पदवीधर शिक्षिका स्मिता कदम, पदवीधर शिक्षक योगेश पाटील, सहाय्यक शिक्षक विजय माने यांनी उत्कृष्ट नियोजन केले. शाळा व्यवस्थापन समिती अध्यक्ष, उपाध्यक्ष व सदस्यांचे मोलाचे सहकार्य लाभले.