- rat२p४८.jpg-
२५N७४८३४
लांजा ः पालू येथील मनोहर नामे यांच्या घरावर पडलेला महावितरणचा विद्युतखांब.
------
पालूत घरावर विद्युत खांब कोसळला
सकाळ वृत्तसेवा
लांजा, ता. २ ः दोन दिवस जोरदार पाऊस असून बुधवारी सकाळी पडलेल्या वादळी पावसाने पालू गावातील एका घरावर महावितरणचा विद्युत खांब कोसळल्याने घराचे मोठे नुकसान झाल्याची घटना घडली. घरातील माणसे शेतात गेल्याने सुदैवाने मोठा अनर्थ टळला; मात्र महावितरणचा विद्युतपुरवठा दिवसभर खंडित झाला होता.
पालू गावातील मनोहर आत्माराम नामे यांच्या घरावर महावितरणचा विद्युतखांब पडल्याने घराचे नुकसान झाले आहे. काही दिवस ऊन-पावसाचा लपंडाव सुरू असतानाच सोमवारपासून पुन्हा पाऊस सक्रिय झाला आहे. सकाळी ९.३० वाजता पडलेल्या पावसाने पालू परिसराला झोडपले. यामध्ये महावितरणचा विद्युतखांब येथील मनोहर नामे यांच्या घरावर कोसळला. त्यामुळे घराचे पत्रे फुटले असून भिंतीला भेगा गेल्या आहेत. घरातील काही माणसे शेतामध्ये गेल्याने सुदैवाने मोठा अनर्थ टळला तर गावातील काही ठिकाणी विद्युतखांब जमिनीकडे झुकल्याने पावसाळ्यात कोसळण्याची दाट शक्यता येथील नागरिकांनी वर्तवली आहे. पालूतील अनेक ठिकाणी महावितरणचे विद्युतखांब गंजलेल्या, सडलेल्या अवस्थेत असून, ग्रामस्थांनी अनेकवेळा महावितरणकडे दुरवस्थेतील खांब काढून त्या ठिकाणी नव्याने उभे करावेत, अशी मागणी केली होती; मात्र ग्रामस्थांच्या या मागणीकडे महावितरण कंपनीने दुर्लक्ष केल्याने पालू गावातील नागरिकांनी तीव्र नाराजी व्यक्त केली आहे. बुधवारी पडलेल्या पावसामुळे जीर्ण झालेला विद्युतखांब पडून येथील शेतकऱ्याला नुकसानीला सामोरे जावे लागले आहे.
--