नियोजनबद्ध व्यावसायिक शेती करा
सूर्यकांत पाटीलः करूळ येथे कृषी दिनानिमित्त शेतकरी मेळावा
सकाळ वृत्तसेवा
वैभववाडी, ता. २ः शेतीतून कुटुंबाच्या गरजा भागल्याच पाहिजेत; परंतु शेती उत्पादनातून आर्थिक उत्पन्न देखील मिळाले पाहिजे. शेतकऱ्यांनी बदलत्या तंत्रज्ञानाचा नियोजनबध्द वापर व्यावसायिक शेती किफायतशीर ठरेल, असे मत तहसीलदार सूर्यकांत पाटील यांनी येथे व्यक्त केले.
पंचायत समिती वैभववाडी व महाराष्ट्र शासन कृषी विभाग वैभववाडी ग्रामपंचायत करूळ यांच्यावतीने कृषी दिनानिमित्त करूळ येथे कृषी मेळाव्याचे आयोजन करण्यात आले. यावेळी गटविकास अधिकारी रामचंद्र जंगले, उपविभागीय अधिकारी उमाकांत पाटील, पोलिस निरीक्षक मनोज सोनवलकर, तालुका कृषी अधिकारी निरंजन देशमुख, जिल्हा बॅंक माजी संचालक दिगंबर पाटील, सरपंच नरेंद्र कोलते, प्रमुख मार्गदर्शक डॉ. प्रसाद देवधर, प्रा. विवेक कदम, उपसरपंच सचिन कोलते, बाळा सुतार, प्रगतशील शेतकरी मंगेश कदम, महेश संसारे, विलास देसाई, उदय कदम, सुरेश सुतार, मंडल कृषी अधिकारी मंदावाड आदी उपस्थित होते.
श्री. पाटील यांनी, वैभववाडीत शेतीला मोठी संधी आहे. या भागात लहान मोठे जलसिंचन प्रकल्प आकाराला येत आहेत. त्यामुळे हा भाग भविष्यात समृध्द झालेला दिसून येईल, असा विश्वास व्यक्त केला. भगीरथ प्रतिष्ठानचे डॉ. प्रसाद देवधर यांनी, सामाजिक व्यवस्थेने राजकीय व्यवस्थेला कधीतरी सांगायला हवे, त्यांनी नेमके काय करायला हवे. शेतकरी हा उत्पादक आहे. शेतकरी जगला तर तुम्ही जगाल. त्यामुळे त्याचा भाव करू नका. बाजारात काय विकले जात आहे, काय शाश्वत आहे, ते पिकविण्याचा प्रयत्न करायला हवा. तरच आपण पुढे जाणार आहोत. आपल्याला स्वतःच्या मालाची किंमत ठरवता आली पाहिजे. आपल्या गरजा भागतील इतके तरी आपण पिकवतो का? माझ्या घरच्या गरजा काय आहेत? हे ओळखून ते पिकविण्याचा प्रयत्न करायला हवा. आपण पिकवलेले उत्पादन विकण्याची आपल्याला लाज वाटता कामा नये, असे सांगितले.
यावेळी पुरस्कार प्राप्त शेतकरी मंगेश कदम, भात पीक स्पर्धेतील विजेते ॲड. अजितसिंह काळे, सुनील पवार, नवलू झोरे या शेतकऱ्यांचा सन्मान करण्यात आला