वारगाव येथून ३ हजाराचा गांजा जप्त
कणकवली, ता.२ ः तालुक्‍यातील वारगाव रोडयेवाडी येथील प्रवीण उर्फ बबन आत्‍माराम गुरव (वय ५५ ) याच्या घरातून ३ हजार २० रुपयांचा गांजा स्थानिक गुन्हा अन्वेषण पथकाने जप्त केला. ही कारवाई काल (ता.१) रात्री दहाच्या सुमारास करण्यात आली. गुरव यांच्या घरातील फोटोमागे गांजाची पुडी लपवून ठेवली होती अशी माहिती स्थानिक गुन्हा अन्वेषण विभागाकडून देण्यात आली.
मुंबई गोवा महामार्गावरील वारगाव रोडये वाडी येथील प्रवीण गुरव गांजा विक्री करतो अशी माहिती स्थानिक गुन्हा अन्वेषणच्या पथकाला मिळाली होती. त्‍यानुसार स्थानिक गुन्हा अन्वेषणचे पोलीस उपनिरीक्षक अनिल हाडळ, उपनिरीक्षक रामचंद्र शेळके, पोलीस सदानंद राणे, स्वाती सावंत. विल्सन डिसोजा, डॉमनिक डिसोजा, किरण देसाई, बस्त्याव डिसोजा, जॅक्‍सन घोन्सालविस आदींनी काल (ता.१) रात्री दहाच्या सुमारास त्यांच्या घरी छापा टाकला. यावेळी घरातील फोटोमागे एक काळ्या रंगाची पिशवी आढळून आली. त्‍यामध्ये ११२ ग्रॅम वजनाचा आणि सुमारे ३ हजार २०० रूपयांचा गांजा आढळून आला. घटनेचा अधिक तपास पोलीस उपनिरीक्षक महेश शेडगे करत आहेत.