swt723.jpg
76012
सिंधुदुर्गनगरी ः जिल्हाधिकारी अनिल पाटील यांना निवेदन देताना ख्रिस्ती बांधव.

आमदार पडळकरांवर कारवाई करा
ख्रिस्ती बांधव ः ‘त्या’ विधानाबाबत जिल्हाधिकाऱ्यांना निवेदन
सकाळ वृत्तसेवा
सिंधुदुर्गनगरी, ता. ७ ः आमदार गोपीचंद पडळकर यांनी ख्रिस्ती बांधवांसंदर्भात केलेल्या वादग्रस्त विधानामुळे समाजाच्या भावना दुखावल्या आहेत. आमदार पडळकरांनी ख्रिस्ती समाजाची जाहीर माफी मागावी; अन्यथा त्यांच्यावर कारवाई करावी, अशी मागणी जिल्ह्यातील ख्रिस्ती बांधवांनी जिल्हा पोलिस अधीक्षक तसेच जिल्हाधिकारी यांच्याकडे निवेदनाद्वारे केली आहे.
जिल्हाधिकारी यांना सादर केलेल्या निवेदनात त्यांनी म्हटले आहे की, सिंधुदुर्ग रोमन कॅथॉलिक या पंथाचे सर्व ख्रिस्ती बांधव मागील शेकडो वर्षे सर्व समाजांसोबत कोणताही जातीभेद न करता गुण्यागोविंदाने राहत आहेत. आमदार पडळकर हे मागील काही कालावधीपासून ख्रिस्ती समाजाविरोधात वादग्रस्त विधान करून समाजांमध्ये तेढ निर्माण करण्याचा प्रयत्न करत आहेत. रोमन कॅथोलिक समाजाने कोणत्याही धर्मपरिवर्तनासाठी कधीही पुढाकार घेत नाही आणि घेतला सुद्धा नाही. आमचे धर्मगुरू (फादरी) कोणत्याही धर्मपरिवर्तनास प्रोत्साहन देत नाहीत. आमची सर्व प्रार्थना व धर्मविधी हे सर्व रजिस्‍ट्रर चर्चमध्येच होत असतात, इतर कोणत्याही बाहेरील ठिकाणी प्रार्थना होत नाही. असे असूनही आमदार पडळकर यांनी ख्रिस्ती समाजाबद्दल व आमच्या फादरांबद्दल वादग्रस्त विधान केलेले आहे. त्यामुळे आमच्या समाजाकडे सर्वसामान्य लोकांचा बघण्याचा दृष्टिकोन बदलू शकतो.
आमदार पडळकर यांनी लोकप्रतिनिधी म्हणून केलेले वक्तव्य हे वादग्रस्त असून, भावना दुखावणारे आहे. त्यांनी केलेले विधान जातीय तेढ निर्माण करणारे असून त्यांच्यावर योग्य ती कारवाई करून त्यांचा राजीनामा लवकरात लवकर घ्यावा. त्यांनी कॅथोलिक ख्रिस्ती समाजाची जाहीर माफी मागावी, अशी मागणी केली आहे. यावेळी पासकोल रॉड्रिग्ज, अनारोजीन लोबो, मायकल डिसोजा, लॉरेन्स मान्येकर, व्हिक्टर डान्टस उपस्थित होते.