76170

वायरी मालवण-केळुस पायी वारी
कुडाळ ः प. पू. सदगुरू श्री नामदेव महाराज मठ वायरी-मालवण ते महाराजांचे समाधीस्थान केळुसपर्यंत यंदा १६ व्या वर्षी पायी नामदिंडी वारी उत्साहात झाली. प. पू. सद्‌गुरू श्री नामदेव महाराजांच्या आशीर्वादाने १५ वर्षे आषाढी एकादशीला महाराजांचा वायरी मालवण येथील मठ ते केळूस येथील समाधी मंदिर या मार्गावर नामस्मरणयुक्त पायी वारी सुरू आहे. दरवर्षीप्रमाणे याहीवर्षी आषाढी एकादशीला मालवण ते केळूस पायी वारी काढण्यात आली. सद्गुरू नामदेव महाराज मठ, वायरी मालवण, कुंभारमाठ, देवली, चिपी विमानतळाला वळसा घालून येसूआका मंदिर परुळेबाजार, पाट, म्हापण बाजारपेठ मार्गे खवणे कापावरून सद्‌गुरू श्री नामदेव महाराज समाधी मंदिर केळुस असा वारीचा मार्ग होता.
.................
76171

कुडाळ इंग्रजी शाळेत वनमहोत्सव
कुडाळ ः येथील क. म. शि. प्र. मंडळाच्या इंग्रजी माध्यमाच्या प्राथमिक शाळेत १ ते ७ जुलै दरम्यान वन महोत्सव उत्साहात साजरा करण्यात आला. मुख्याध्यापिका मुमताज शेख यांच्या मार्गदर्शनाखाली विविध उपक्रम झाले. त्यात बी रुजवणे, घोषवाक्ये, झाडे लावणे, वृक्ष‌दिंडी आदींचा समावेश होता. शाळेच्या आवारात वि‌द्यार्थ्यांमार्फत विविध झाडे लावली. चौथीच्या विद्यार्थ्यांनी वृक्ष संवर्धन जनज‌ागृतीसाठी नृत्याचे सादरीकरण केले. शिक्षक रियाज शेख यांनी विद्यार्थ्यांना वनौषधींची माहिती दिली. विद्यार्थ्यांमध्ये झाडांबद्दल जागरुकता निर्माण व्हावी, यासाठी शाळेत‌र्फे वृक्षदिंडीचे आयोजन करण्यात आले. यामध्ये विद्यार्थी उत्साहात सहभागी झाले.
....................
76172
कुडाळ हायस्कूलतर्फे मितालीचा सत्कार
कुडाळ ः कुडाळ हायस्कूलची विद्यार्थिनी कबड्डीपटू मिताली गावडे हिची राष्ट्रीय कबड्डी स्पर्धेत १८ वर्षे वयोगट महाराष्ट्र संघात निवड झाली. याबद्दल संस्था पदाधिकारी का. आ. सामंत, सुरेश चव्हाण, मुख्याध्यापक व्ही. एम. वराडे, पर्यवेक्षक श्री. तेली आदींनी अभिनंदन केले. मितालीला क्रीडाशिक्षक वैभव कोंडसकर यांचे मार्गदर्शन लाभले.