- rat८p२.jpg-
२५N७६१२८
संगमेश्वर ः तालुक्यातील माखजन-आरवली रस्त्यावर पडलेल्या खड्ड्यात साचलेले पाणी.

माखजन-आरवली मार्गावर खड्डे
बांधकाम विभागाचे दुर्लक्ष; दुचाकीस्वार, सायकलस्वारांची कसरत
सकाळ वृत्तसेवा
संगमेश्वर, ता. ८ ः संगमेश्वर तालुक्यातील माखजन-आरवली या मुख्य रस्त्यावर खड्ड्यांचे साम्राज्य पसरलेले आहे. हा रस्ता वाहतुकीसाठी महत्त्वाचा आहे. सध्या या रस्त्याची दयनीय अवस्था झाली असून, त्याकडे सार्वजनिक बांधकाम विभाग लक्ष देत नसल्याने प्रवाशांमध्ये नाराजी व्यक्त केली जात आहे.
माखजन-आरवली रस्त्यावर कोंडीवरे, बुरंबाड या गावात मोठमोठे खड्डे पडलेले असून, ते चिखलयुक्त पाण्यांनी भरून गेले आहेत. बाजूपट्टीही नामशेष झालेली आहे. काही ठिकाणी बाजूपट्टीची माती वाहून गेलेली आहे. दोन गाड्या समोरासमोर आल्या की, वाहने चालवणे अडचणीचे होते. या रस्त्यावरून माखजन पंचक्रोशीतील सुमारे २२ गावातील रहिवासी सतत ये-जा करत असतात. या मार्गावरून सतत एसटी वाहतूक सुरू असते. रहदारीच्या आणि मुख्य अशा रस्त्याकडे दुर्लक्ष केले जात असल्यामुळे ग्रामस्थांकडून नाराजी व्यक्त होत आहे. अनेक ठिकाणी खड्डे पडलेल्या भागात बारीक खडी इतरत्र पसरली आहे. या रस्त्यावरून शाळकरी मुले सायकलनेदेखील ये-जा करत असतात. खडीवरून सायकल घसरून मुले पडण्याचे प्रकार अनेकवेळा घडलेले आहेत. तसेच दुचाकीस्वारही घसरून पडलेले आहेत. नादुरुस्त रस्त्यामुळे वाहने घसरण्याची संख्या वाढत असून, त्यात किरकोळ दुखापतही होत आहेत. गोकुळाष्टमी व गणेशोत्सव दीड महिन्यांवर येऊन ठेपलेला आहे. या भागात येणाऱ्या चाकरमान्यांची संख्या मोठी असते. विविध गावात जाण्यासाठी हा एकमात्र रस्ता असल्यामुळे पावसाने उघडीप देताच या रस्त्यावरचे खड्डे तत्काळ योग्य पद्धतीने भरण्यात यावेत, अशी मागणी केली जात आहे.