76181

रिक्षाचालकांच्या समस्यांकडे दुर्लक्ष

संघटनेची व्यथा; सिंधुदुर्गनगरीत अधिकाऱ्यांशी चर्चा

सकाळ वृत्तसेवा
तळेरे, ता. ८ : कोकण विभाग रिक्षा टॅक्सी महासंघाच्या वतीने उपप्रादेशिक परिवहन अधिकारी विजयकुमार काळे यांची भेट घेऊन रिक्षाचालकांच्या समस्यांबाबत निवेदन देऊन चर्चा करण्यात आली.
यावेळी प्रामुख्याने सिंधुदुर्ग जिल्ह्यामध्ये एखादा रिक्षा चालक जर मृत झाला असेल तर, त्याच्या वारसाला सक्सेशन सर्टिफिकेट सक्तीचे करण्यात आले आहे. या विरोधात उपप्रादेशिक परिवहन अधिकारी यांच्याशी चर्चा विनिमय करण्यात आली. ज्यावेळी नवीन रिक्षा पासिंगसाठी येते, त्यावेळी त्या रिक्षाचालकाचा वारस नोंद केली जाते; परंतु रजिस्ट्रेशन झालेल्या असून वारस नोंद न झालेल्या काही (जुन्या) रिक्षा पासिंग करण्यात आलेल्या आहेत, अशा रिक्षांवर वारस नोंद केलेली नाही. अशा परवानाधारक रिक्षांसाठी उपप्रदेशिक परिवहन अधिकारी यांच्या नावे विहित नमुन्यात अर्ज सादर करावा व रिक्षाचालकांनी आपला वारस नोंद करून घ्यावी. वारस नोंद करतेवेळी वारसाचे आधार कार्ड, झेरॉक्स प्रत सोबत जोडावी, असा तोडगा महासंघाच्या वतीने काढण्यात आला. जिल्ह्यातील सर्व रिक्षा चालकांनी लवकरात लवकर आपली वारस नोंद करून घ्यावी, असे आवाहन रिक्षा संघटनेच्या वतीने करण्यात आले आहे. हा नियम रिक्षाचालकाने विहित नमुन्यातील फॉर्म भरून दिल्यानंतर लागू होईल.
----
सिंधुदुर्गनगरीत येणाऱ्यांना प्राधान्य द्या!
सिंधुदुर्गनगरी येथे पासिंगसाठी येणाऱ्या रिक्षांना प्रथम प्राधान्य देण्यात यावे, असे संघटनेच्या वतीने सुचविण्यात आले. ही मागणी सुद्धा यावेळी चर्चेदरम्यान मान्य करण्यात आली. यावेळी कोकण विभाग रिक्षा टॅक्सी महासंघाचे कार्याध्यक्ष संतोष नाईक, सहसचिव सुधीर पराडकर, कणकवली तालुकाध्यक्ष मंगेश सावंत, कुडाळ तालुकाध्यक्ष रवी माने, मालवण तालुका उपाध्यक्ष सुनील पातडे, सावंतवाडी शहराध्यक्ष शैलेश गंवडळकर आदी उपस्थित होते.