rat८p१०.jpg-
२५N७६१४१
चिपळूण : मिरजोळी ते उक्ताड परिसरातील राष्ट्रीय महामार्गावर पडलेले खड्डे.

खड्डे भरा, अन्यथा दिव्यांग रस्त्यावर उतरतील
संघटनेचा इशारा; मिरजोळी ते उक्ताड रस्त्याची अवस्था बिकट
सकाळ वृत्तसेवा
चिपळूण, ता. ९ : गुहागर-विजापूर राष्ट्रीय महामार्गावरील मिरजोळी ते उक्ताड परिसरातील खड्ड्यांचा वाहनधारकांना त्रास होत आहे. पुढील आठ दिवसात खड्डे भरले नाहीत तर परिसरातील दिव्यांग बांधव राष्ट्रीय महामार्ग विभागासमोर आंदोलन करतील, असा इशारा दिव्यांग संघटनेचे जिल्हा सरचिटणीस संतोष होळकर यांनी दिली.
होळकर म्हणाले, येथील रस्त्यावर प्रचंड मोठे खड्डे पडलेले आहेत. काही ठिकाणी तळी साचल्यासारखी स्थिती आहे. उन्हाळ्यापूर्वी राष्ट्रीय महामार्ग उपविभागाने येथे केलेल्या थातुरमातूर उपाययोजना केल्या होत्या. पावसात त्याचे तीनतेरा वाजलेले आहेत. त्यामुळे पावसाळ्यात येथील खड्ड्यांनी पुन्हा आपले ''डोकं वर'' काढण्यास सुरुवात केली आहे. या खड्ड्यात वारंवार होणारे अपघात, अंगावर उडणारे चिखलयुक्त खराब पाणी यामुळे स्थानिकही प्रचंड त्रस्त झालेले आहेत. गुहागर-विजापूर राष्ट्रीय महामार्गावर मिरजोळी ते उक्ताड परिसरात सर्वाधिक खड्डे आहेत. याबाबत होळकर म्हणाले, रस्त्यावर पडलेल्या खड्ड्यांची माहिती सार्वजनिक बांधकाम विभागाला देण्यात आली होती; मात्र अधिकाऱ्यांनी रस्ते दुरुस्तीकडे लक्ष दिले नाही. राष्ट्रीय महामार्गाचा दर्जा या रस्त्याला आहे. बिकट अवस्था असतानाही अधिकाऱ्यांनी दुर्लक्ष केले आहे. या मार्गावरून सायकल, दुचाकीवरून विद्यार्थी शाळा, महाविद्यालयात ये-जा करतात. रस्त्यावरून ये-जा करणाऱ्या दिव्यांग बांधवांना त्याचा सर्वाधिक त्रास होतो. शहराच्या प्रवेशद्वारावरच या रस्त्याची एवढी भयावह अवस्था झाली आहे. स्थानिक लोकप्रतिनिधींनी आवाज उठवताच येथे दगड, खडी, माती टाकून खड्डे भरले जातात. यावर्षी पावसाळ्याच्या सुरुवातीलाच खड्डे पडले; मात्र अजून रस्त्याची दुरुस्ती करण्यात आलेली नाही.
---