सरकारी, निमसरकारी
कर्मचाऱ्यांची आज धरणे
सकाळ वृत्तसेवा
रत्नागिरी, ता. ८ ः चार श्रमसंहिता आणि पीएफआरडीए कायदा रद्द करणे यांसह इतर प्रमुख मागण्यांकडे शासनाचे लक्ष वेधण्यासाठी राज्य सरकारी, जिल्हा परिषद निमसरकारी, शिक्षक व शिक्षकेत्तर कर्मचारी यांचे धरणे आंदोलन उद्या (ता. ९) दुपारी १ ते ३ या कालावधीत जिल्हा परिषद व जिल्हाधिकारी कार्यालयासमोर होणार आहे.
केंद्रीय कामगार, कर्मचारी, शेतकरी संघटना, ट्रेड युनियन व अखिल भारतीय राज्य सरकारी कर्मचारी महासंघाच्या संयुक्त बैठकीत घेण्यात आलेल्या धोरणात्मक निर्णयाच्या अनुषंगाने महाराष्ट्रात राज्य सरकारी कर्मचारी, जिल्हा परिषद, शिक्षक-शिक्षकेत्तर समन्वय समितीची सभा नुकतीच पार पडली. या बैठकीत नेत्यांनी राज्यशासनाच्या उदासीन धोरणाबाबत खंत बोलून दाखवली. नवीन सरकार स्थापन झाल्यानंतर ८ महिन्यात ठोस निर्णय झालेले नाहीत. त्यासाठी संघटनेमार्फत सातत्याने पत्रव्यवहारही केला गेला; परंतु संघटनात्मक प्रयत्नांना वाटाण्याच्या अक्षता लावण्यात आल्या. प्रलंबित मागण्यांबाबत कर्मचारी-शिक्षकांमध्ये कमालीचा असंतोष धुमसत आहे. शासनाला जागे करण्यासाठी उद्या कर्मचारी, कामगार संघटना व अखिल भारतीय राज्य सरकारी कर्मचारी महासंघाच्यावतीने देशव्यापी संप पुकारण्यात आला आहे. यामध्ये जिल्हा परिषद कर्मचारी महासंघ सहभागी होणार आहे. उद्या दुपारी १ ते ३ या वेळेत जिल्हा परिषद कार्यालय आणि त्यानंतर जिल्हाधिकारी कार्यालयात निदर्शने केली जाणार असल्याचे जिल्हा परिषद कर्मचारी महासंघाचे अध्यक्ष दिनेश सिनकर, सचिव प्रवीण पिलणकर व कार्याध्यक्ष सुरेंद्र खाडे यांनी सांगितले.