‘त्या’ विद्यार्थ्यांना तृतीय वर्षात प्रवेश द्या

काँग्रेसची मागणी; बारावीत कमी गुण असल्याने प्रश्न

सकाळ वृत्तसेवा
देवगड, ता. ९ ः येथील स. ह. केळकर महाविद्यालयातील काही तृतीय वर्षाच्या विद्यार्थ्यांना वर्गात बसवून घेण्यात यावे, अशी काँग्रेसची मागणी आहे. विद्यापीठ आणि शासनाच्या चुकीच्या निर्णयानुसार बारावीमध्ये कमी गुण असल्याने तृतीय वर्षासाठी प्रविष्ठ करून घेण्यात येत नसल्याचे त्यांचे म्हणणे होते. याबाबत युवक काँग्रेस जिल्हाध्यक्ष किरण टेंबुलकर यांनी येथील महाविद्यालयाच्या प्राचार्यांना निवेदन दिले. प्रभारी प्राचार्य विजयकुमार कुनुरे यांना विचारले असता त्यांनी, हा विषय महाविद्यालयापुरता मर्यादित नसून मुंबई विद्यापीठाचा असल्याचे सांगितले.
तृतीय वर्षाच्या काही विद्यार्थ्यांनी बारावीनंतर प्रथम आणि द्वितीय वर्षासाठी प्रवेश घेतला होता. आता तृतीय वर्षात प्रवेश घेताना बारावीमध्ये कमी गुण असल्याने तृतीय वर्षासाठी प्रवेश नाकारला जात असल्याचे श्री. टेंबुलकर यांचे म्हणणे आहे. यासाठी त्यांनी महाविद्यालय प्रशासनाला निवेदन दिले. यावेळी काँग्रेसचे तालुकाध्यक्ष उमेश कुळकर्णी उपस्थित होते. निवेदनात म्हटले आहे की, विज्ञान शाखेतील तृतीय वर्षातील विद्यार्थ्यांची प्रवेश प्रक्रिया शासनाच्या आणि विद्यापीठाच्या चुकीच्या धोरणामुळे वादातीत आहे; परंतु महाविद्यालय सुरू होऊन महिना होऊनही विद्यार्थी शिक्षणापासून वंचित राहत आहेत. भविष्यात शासन निर्णय सकारात्मक होईलही, परंतु विद्यार्थ्यांचा शैक्षणिक अभ्यासक्रम चुकत आहे. त्यामुळे वस्तुस्थिती पाहता संबंधित विद्यार्थ्यांना वर्गात बसविण्यासाठी महाविद्यालयाने परवानगी द्यावी; अन्यथा विद्यापीठ आणि शासनाच्या विरोधात १५ ऑगस्टला उपोषणास बसणार आहोत, असे म्हटले आहे.
याबाबत महाविद्यालयाचे प्रभारी प्राचार्य विजयकुमार कुनुरे यांना विचारले असता त्यांनी, हा विषय केवळ येथील महाविद्यालयापुरता मर्यादित नसून मुंबई विद्यापीठातंर्गत येणाऱ्या महाविद्यालय प्रवेशाचा आहे. त्यामुळे विद्यापीठाकडून निर्णय आल्याशिवाय याबाबत येथे निर्णय घेता येणार नाही. येथील महाविद्यालयाचे मोजकेच विद्यार्थी अशा प्रवेशापासून वंचित आहेत. संबंधित विद्यार्थ्यांना विभाग बदलून प्रवेश दिला जाऊ शकतो; मात्र त्यांना त्याच विभागात प्रवेश हवा असल्याने विद्यापीठाचा निर्णय आवश्यक ठरेल, असे सांगितले.