मिताली कुलकर्णी मुंबई विद्यापिठात प्रथम
देवरूख कला महाविद्यालय; निकी बाणेचा चौथा क्रमांक
सकाळ वृत्तसेवा
संगमेश्वर, ता. ११ ः देवरूख कॉलेज ऑफ आर्ट अँड डिझाईन या कला महाविद्यालयाचा द्वितीय व चतुर्थ वर्षाचा निकाल कला महाविद्यालयाचा शंभर टक्के लागला असून, सर्व विद्यार्थी प्रथम श्रेणीत उत्तीर्ण झालेले आहेत. द्वितीय वर्ष चित्रकला परीक्षेत विद्यापिठाच्या यादीत प्रथम येण्याचा मान डी-कॅडची विद्यार्थिनी मिताली कुलकर्णी हिने तर निकी बाणे ही विद्यापिठात चौथी आली आहे.
देवरूख कॉलेज ऑफ आर्ट अँड डिझाईन येथे दहावीनंतर अप्लाईड आर्टमध्ये शिक्षण घेण्यासाठी शासन मान्यताप्राप्त दोन वर्षाचा पदविका अभ्यासक्रम २०२१-२२ पासून चालू करण्यात आला आहे. त्याचाही शैक्षणिक वर्ष २४-२५ चा निकाल जाहीर झाला असून, तोही शंभर टक्के लागला आहे. त्यामध्ये दहावीनंतर दोन वर्षाचा डिप्लोमा केला तर बारावी समतुल्य प्रमाणपत्र मिळते व त्यानंतर विद्यार्थ्यांना कोणत्याही वेगळ्या शाखेत प्रवेश घेता येतो. मुंबई विद्यापिठाची संलग्न व कलासंचलनालयाचे मान्यता असणारे डी-कॅड हे कोकणातील पहिले कला महाविद्यालय आहे. २००७ मध्ये या कला महाविद्यालयाची स्थापना झाली. खोल्या अत्याधुनिक प्रिंट मेकिंग स्टुडिओ, म्युरल स्टुडिओ, संगणक लॅब विद्यार्थ्यांसाठी कला महाविद्यालयाच्या इमारतीत वस्तीगृह सुविधा असणारे हे कला महाविद्यालय आहे. येथे प्रसिद्ध चित्रकारांची प्रात्यक्षिके व चर्चासत्रं आयोजित केली जातात तसेच विद्यार्थ्यांसाठी चित्रकलेतील कार्यशाळांचेही आयोजन केले जाते. सर्व यशस्वी विद्यार्थ्यांचे संस्थाध्यक्ष अजय पित्रे व भारती पित्रे, सचिव विजय वीरकर तसेच कला महाविद्यालयाचे प्राचार्य रणजीत मराठे यांनी कौतुक केले आहे.