खेंडमधील नुकसानग्रस्तांशी शिवसेनेचा संवाद
संरक्षक भिंत कोसळली; पुनर्बांधणीसाठी निधीचे आश्वासन
सकाळ वृत्तसेवा
चिपळूण, ता. १२ : शहरातील खेंड कांगणेवाडी परिसरात दरड कोसळून संरक्षक भिंतीचा मोठा भाग जमीनदोस्त झाला. त्यामुळे परिसरातील नागरिकांमध्ये भीतीचे वातावरण आहे. या घटनेची माहिती मिळताच शिवसेना शहरप्रमुख व माजी नगरसेवक उमेश सकपाळ यांनी तातडीने घटनास्थळी भेट देऊन पाहणी केली. त्यांनी स्थानिक रहिवाशांशी संवाद साधून त्यांच्या अडचणी जाणून घेतल्या.
या गंभीर परिस्थितीवर तातडीने पावले उचलत सकपाळ यांनी मुंबई गाठून पालकमंत्री उदय सामंत यांच्याशी सविस्तर चर्चा केली. या चर्चेदरम्यान पालकमंत्र्यांनी खेड कांगणेवाडी येथील संरक्षण भिंत दुरुस्तीसाठी आवश्यक तेवढा भरीव निधी मंजूर करण्याचे आश्वासन दिले आहे. दरडग्रस्त ठिकाणी पिचिंग करून ते स्थिर केले जाईल तसेच अत्याधुनिक तंत्रज्ञानाचा वापर करून नवीन संरक्षक भिंत उभारण्यात येईल, असेही त्यांनी स्पष्ट केले.
या ठिकाणी कोणत्याही ग्रामस्थांचे स्थलांतर होणार नाही. आम्ही त्यांना पूर्णपणे सुरक्षित ठेवण्याची जबाबदारी घेऊ. शासनाच्या माध्यमातून शक्य ती सर्व मदत करण्यात येईल, असे आश्वासन शिवसेना शहरप्रमुख उमेश सकपाळ यांनी दिले.