77105
सावंतवाडीत चोरीच्या घटनेनंतर दहशत

ठाकरे गटाची खंत; कायदा सुव्यवस्था राखण्याची मागणी

सकाळ वृत्तसेवा
सावंतवाडी, ता. १२ ः शहरात नुकत्याच घडलेल्या चोरीच्या घटनेनंतर नागरिकांमध्ये भीती आहे. या पार्श्वभूमीवर आज ठाकरे शिवसेनेच्या पदाधिकाऱ्यांनी पोलिस निरीक्षक अमोल चव्हाण यांना निवेदन दिले. शहरातील कायदा व सुव्यवस्था राखण्यासाठी आणि भविष्यात अशा घटना पुन्हा घडू नयेत, यासाठी तातडीने उपाययोजना करण्याची मागणी केली.
निवेदनात म्हटले आहे, चोरीच्या घटनेत चोरट्यांकडे शस्त्रे आढळल्याने परिस्थितीचे गांभीर्य वाढले आहे. शांतताप्रिय सावंतवाडी शहराची प्रतिमा अशा घटनांमुळे मलिन होत आहे. शहराच्या सर्व सीमा, मुख्य चौक, दाट वस्ती आणि सोसायट्यांमध्ये सीसीटीव्ही कॅमेरे बसवावेत. तसेच रात्री १२ ते सकाळी ६ या वेळेत पोलिसांची गस्त वाढविण्यावर भर दिला आहे. सर्व परप्रांतीय कामगार आणि भाडेकरूंची पोलिस ठाण्यात नोंदणी अनिवार्य करावी. संशयास्पद हालचाली किंवा गैरप्रकार आढळल्यास नागरिकांना, विशेषतः ज्येष्ठ नागरिकांना, त्वरित संपर्क साधता यावा, यासाठी हेल्पलाइन क्रमांक प्रसिद्ध करावा आणि तो प्रत्येक घरात उपलब्ध करून द्यावा किंवा चौकाचौकात प्रसिद्धी फलक लावावेत. नागरिकांना सुरक्षेच्या उपायांची माहिती देण्यासाठी वेळोवेळी जागरुकता सभा घेण्याची मागणी केली आहे. याव्यतिरिक्त शहरातील लॉजिंगमध्ये उतरणाऱ्या व्यक्तींची नोंद ठेवण्याबाबत आणि संशयास्पद व्यक्ती आढळल्यास त्वरित पोलिस ठाण्याशी संपर्क साधण्याबाबत लॉजिंग व हॉटेल मालकांना सूचना द्याव्यात. या उपाययोजनांची त्वरित अंमलबजावणी करून शहरातील नागरिकांच्या सुरक्षिततेचे रक्षण करण्याची विनंती निवेदनाद्वारे केली आहे.
यावेळी शहर संघटक निशांत तोरसकर, शहर प्रवक्ते आशिष सुभेदार, शहर प्रमुख शैलेश गौंडळकर, महिला शहर संघटक समीरा खलील, उपशहर प्रमुख शेखर सुभेदार, शाखा प्रमुख अमोल सारंग आणि जावेद शहा उपस्थित होते.