77089

चिमुकल्यांकडून बियांची पेरणी

कळसुलकर शाळेतर्फे नरेंद्र डोंगर परिसरात वृक्षारोपण

सावंतवाडी, ता. १२ ः येथील सावंतवाडी एज्युकेशन सोसायटी प्राथमिक शाळा सावंतवाडी अर्थात कळसुलकर प्राथमिक शाळेच्या विद्यार्थ्यांसाठी आज ‘आनंददायी शनिवार’निमित्त बी पेरणी व वृक्षारोपणाचा कार्यक्रम नरेंद्र डोंगर येथे घेण्यात आला.
यावेळी चिमुकल्यांनी विविध झाडांच्या बिया तसेच आंबा, काजू, फणस, चिंच, जांभूळ, निरफणस आदी विविध झाडांची रोपे आणत वृक्षारोपण केले. सोबतच विविध झाडांच्या बिया मुलांनी जमिनीमध्ये पेरल्या. यातून वृक्ष लागवड होऊन हेच वृक्ष पुढे प्राणी-पक्षी यांचे आश्रयस्थान बनतील, पर्यायाने माणसालाही याचा फार मोठा उपयोग होईल, ही भावना मुलांच्या अंगी रुजवण्याचा प्रयत्न शाळेने केला. या वृक्षारोपण कार्यक्रमास सावंतवाडी केंद्राचे केंद्रप्रमुख कमलाकर ठाकूर यांनी शुभेच्छा दिल्या. संस्थेच्या संचालिका नम्रता नेवगी, प्राथमिक शाळेचे मुख्याध्यापक श्री. सावंत, पालक श्रीमती पडते, वर्गशिक्षक डी. जी. वरक, अमित कांबळे, ज्योत्स्ना गुंजाळ, प्राची बिले, स्वरा राऊळ, संजना आडेलकर, स्मिता घाडीगावकर आदी शिक्षक उपस्थित होते.