-rat१४p११.jpg-
२५N७७४२४
पावस ः गणेशोत्सव जवळ आल्याने मूर्तिकार वामन सुवरे मूर्तिकामात मग्न आहेत.
----

मूर्तिकार वामन सुवरे यांच्या चित्रशाळेत लगबग
वेगवेगळ्या १०० मूर्तींना आकार; मातीसह अन्य साहित्याच्या किमतीत वाढ
सकाळ वृत्तसेवा
पावस, ता. १४ ः श्रावण महिन्यानंतर येणाऱ्या गणेशोत्सवाचे कोकणवासियांना वेध लागले आहेत. त्यामुळे चित्रशाळांतील मूर्तिकार गणेश मूर्तिकामात मग्न झाले आहेत. रत्नागिरी वरचा फगरवठार येथील मूर्तिकार वामन सुवरे यांच्या चित्रशाळेत शंभर गणेशमूर्ती आतापर्यंत साकार करण्यात आल्या आहेत.
यावर्षी कृष्ण अवतारातील कृष्ण बलरामाचे बंधूप्रेम, यशोदा कृष्ण दहीहंडी फोडताना, लालबागचा राजा सिंहासनावर विराजमान झालेली गणेशमूर्ती अशा विविध प्रकारच्या गणेशमूर्ती साकारल्या जात आहेत. गेली ३० वर्षे सुवरे मूर्तिकाम करत आहेत. त्यामुळेच पावस, रत्नागिरी पंचक्रोशीतील भाविक वामन सुवरे यांच्या चित्रशाळेला भेट देऊन गणेशमूर्ती साकारण्यास सांगत आहेत.
गणपती मूर्तीसाठी लागणारी माती, रंग, ब्रश, गणेशमूर्तीसाठी लागणारे पितांबर, हिरे, फेटे यांच्या किमतीत वाढ झाली असली तरीही सर्वांनाच परवडेल, अशा किमतीत गणेशमूर्ती देण्यासाठीच प्रयत्नशील असल्याचे सुवरे यांनी सांगितले. या कलेतून प्रेम, आपुलकी वृद्धिंगत होत आहे. यंदा मातीसह अन्य साहित्याच्या किमतीत कमालीची वाढ झालेली आहे. परिणामी त्याचा परिणाम गणेशमूर्तीच्या किमतीवरही होणार असल्याचे मूर्तीकारांकडून सांगण्यात येत आहे.
-----
मूर्तीची नोंदणीला पसंती
कोकणातील सर्वात लोकप्रिय उत्सव म्हणून गणेशोत्सवाकडे पाहिले जाते. चाकरमानी याकाळात आपापल्या गावी येत असतात. मोठ्या उत्सवात हा सण साजरा केला जातो. आपल्या पसंतीप्रमाणे मूर्तीची प्रतिष्ठापना करण्यावर गणेशभक्तांकडून भर दिला जातो. त्यासाठी काही दिवस आधीच चित्रशाळेत जाऊन मूर्तीची नोंदणीचे काम भक्तांकडून सुरू आहे.