भोळवली येथे
भातपिकांचे प्रात्यक्षिक
मंडणगड ः तालुक्यातील भोळवली गावच्या सरपंच संजना राणे यांच्या शेतावर चारसूत्री भातपिक लागवड प्रात्यक्षिक घेण्यात आले. या वेळी युरिया ब्रिगेडचा वापर, गिरीपुष्पाचा वापर, फळबाग लागवड योजनेविषयी माहिती, शेतकरी कार्ड याबद्दल शेतकऱ्यांना मार्गदर्शन व प्रात्यक्षिक दाखवण्यात आले. या वेळी उपकृषी अधिकारी सचिन पवार, साहाय्यक कृषी अधिकारी श्रीकांत कोटाळे उपस्थित होते.

‘आठल्ये-सप्रे’मध्ये
लोकसंख्या दिन साजरा
संगमेश्वर ः जागतिक लोकसंख्या दिनानिमित्त देवरूख शिक्षण प्रसारक मंडळाच्या आठल्ये-सप्रे-पित्रे कनिष्ठ महाविद्यालयात आयोजित कार्यक्रमात भूगोलशास्त्राचे अभ्यासक व अध्यापक प्रा. मयुरेश राणे यांनी उपस्थित विद्यार्थ्यांना मार्गदर्शन केले. प्रा. राणे यांनी जागतिक लोकसंख्यावाढीच्या समस्यांवर प्रकाश टाकताना त्याची गंभीरता अनेक मुद्द्यांद्वारे स्पष्ट केली. लोकसंख्येच्या नियंत्रित वाढीचे फायदे आणि त्याचे समाजावर व पर्यावरणावर होणारे अनुकूल परिणाम तसेच लोकसंख्या रोखण्यासाठीच्या जनजागृतीचे महत्त्व अधोरेखित केले. कार्यक्रमात प्राचार्य डॉ. नरेंद्र तेंडोलकर यांनी राष्ट्रनिर्मितीत तरुणाईचा असणारा महत्त्वपूर्ण सहभाग, शहरी लोकसंख्यावाढीचे आव्हान व निर्माण होणाऱ्या नवनवीन समस्या याचबरोबर शिक्षण, आरोग्यसेवा व शाश्वत विकासासाठी लोकसंख्या नियंत्रणाचे महत्व सांगितले.

महाराजस्व अंतर्गत
कोसुंबमध्ये दाखले वाटप
साडवली ः संगमेश्वर तालुक्यातील कोसुंब ग्रामपंचायत कोसुंब येथे महाराजस्व अभियानांतर्गत विविध शासकीय सेवा आणि दाखले वितरणाचा कार्यक्रम झाला. उपक्रमात नवीन शिधापत्रिका, सातबारा उतारे, विविध दाखले यांचे वाटप करण्यात आले. या वेळी उपविभागीय अधिकारी विश्वजित गांताडे, तहसीलदार अमृता साबळे उपस्थित होते. ग्राममहसूल अधिकारी गजानन होळगे यांनी ग्रामस्थ व महिला बचतगट, अंगणवाडी सेविका यांचे स्वागत केले.