77732

दोडामार्गात महिला-पुरुषांना समान संधी

सरपंचपद आरक्षण; ३८ ग्रामपंचायतींसाठी सोडत जाहीर

सकाळ वृत्तसेवा
दोडामार्ग, ता. १५ : ग्रामपंचायतींच्या झालेल्या आरक्षण सोडतीत तालुक्यातील अठरा ग्रामपंचायती महिलांसाठी आरक्षित झाल्या असून अन्य अठराही ग्रामपंचायतींवर पुरुषांना पसंती दिल्यास पुरुष व महिला असा समान पदभार पाहावयास मिळणार आहे. २०२५ ते २०३० या कालावधीसाठी आज थेट सरपंचपदाच्या आरक्षण सोडती झाल्या. आरक्षण बदलल्याने गावच्या राजकीय वर्तुळात घडामोडी सुरू होणार आहेत. सोडतीनंतर काहींच्या चेहऱ्यावर उत्साहाचे भाव पाहावयास मिळाले.
येथील तहसील कार्यालयाच्या सभागृहात ही आरक्षण सोडत झाली. यावेळी प्रभारी तहसीलदार प्रज्ञा राजमाने, सहायक गटविकास अधिकारी यशवंत गवस, मंडळ अधिकारी शरद शिरसाट यांच्या उपस्थितीत ही आरक्षण सोडत काढण्यात आली. ग्रामपंचायतींच्या २०२५ ते २०३० या कालावधीत होणाऱ्या सार्वत्रिक निवडणुका लक्षात घेऊन सरपंच आरक्षण आज निश्चित करण्यात आले. सर्वोच्च न्यायालयाच्या आदेशानुसार तालुक्यातील सरपंच आरक्षण प्रक्रिया झाली. कौस्तुभ खांबल या विद्यार्थ्याने चिठ्ठ्या उचलून आरक्षण निश्चित केले. सोडतीवेळी राजकीय पदाधिकारी, गावातील संभाव्य उमेदवार व ग्रामस्थ आदी उपस्थित होते. या सोडतीमुळे अनेकांना संधी गमवावी लागली, तर अनेक गावांमध्ये नवीन चेहऱ्यांना संधी मिळण्याचा मार्ग मोकळा झाला आहे. त्यामुळे गावागावांतील राजकीय समीकरणे बदलण्याची शक्यता निर्माण झाली आहे.
----------
विविध प्रवर्गानुसार आरक्षण असे-
अनुसूचित जाती (महिला)-साटेली भेडशी, अनुसूचित जाती-तेरवण मेढे, खुला प्रवर्ग (महिला) -कुडासे, तळकट, कुंब्रल, घोटगेवाडी, झोळंबे, परमे-पणतुर्ली, बोडदे, बोडण, मणेरी, मांगेली, पिकुळे, मोरगाव. खुला प्रवर्ग-आयनोडे हेवाळे, कळणे, विर्डी, कोनाळ, आयी, उसप, कुडासे खुर्द, केर, झरे -२, फुकेरी, माटणे, सासोली. ना. मा. प्र. (महिला)-घोटगे, मोर्ले, कोलझर, झरेबांबर, पाटये पुनर्वसन, सासोली खुर्द. ना. मा. प्र-वझरे, खोक्रल, आडाळी, आंबडगाव, तळेखोल.