77783

सहकाराला गती देणे आवश्‍यक

बाळ परब ः फेडरेशनची भूमिकाही महत्त्वाची

सकाळ वृत्तसेवा
सावंतवाडी, ता. १६ ः ‘‘सहकार ही एक महत्त्वाची चळवळ आहे. ती अधिक गतीने पुढे नेण्यासाठी पतसंस्था फेडरेशनची भूमिका अत्यंत महत्त्वाची आहे,’’ असे प्रतिपादन सहकारी संस्थांचे नवनिर्वाचित जिल्हा उपनिबंधक बाळ परब यांनी केले.
सिंधुदुर्ग जिल्हा सहकारी पतसंस्था फेडरेशनच्या नवनिर्वाचित संचालकांनी नुकतीच श्री. परब यांची भेट घेत शुभेच्छा दिल्या. यावेळी पतसंस्थांच्या विविध समस्यांवर आणि फेडरेशनच्या आगामी वाटचालीवर सविस्तर चर्चा करण्यात आली. या प्रसंगी फेडरेशनचे अध्यक्ष सुनील राऊळ, कार्याध्यक्ष जॉय डॉन्टस, उपाध्यक्ष नंदकिशोर कोरगावकर, सुनील नाईक आदींसह संचालक बाबूराव कविटकर, समीर वंजारी, सुभाष चौधरी, सावंतवाडीचे सहाय्यक निबंधक सुजय कदम, पतसंस्था फेडरेशनचे सचिव महेश्वर कुंभार आदी उपस्थित होते.
पतसंस्था पदाधिकारी, कर्मचाऱ्यांसाठी प्रशिक्षण अनिवार्य असल्याने फेडरेशनतर्फे लवकरच प्रशिक्षण शिबिराचे आयोजन करण्यात येणार असल्याचे चर्चेदरम्यान ठरले. प्रत्येक दोन तालुक्यांसाठी मार्गदर्शन शिबिरे आयोजित करण्याचा निर्णयही घेतला. पतसंस्थांसमोरील कर्जवसुलीची मोठी समस्या लक्षात घेता, यावर उपाययोजनांबाबतही सविस्तर चर्चा झाली. यापुढे पतसंस्था फेडरेशन अधिक प्रभावीपणे काम करून पतसंस्था चळवळ सक्षम करणार असल्याचे यावेळी नमूद केले. फेडरेशन जे उपक्रम हाती घेईल, त्याला पूर्ण सहकार्य राहील, असे आश्वासन परब यांनी दिले. फेडरेशनने मार्गदर्शन शिबिरे आयोजित करावीत, असे आवाहनही त्यांनी केले.