चला करूया गणपती कार्यशाळा
चिपळुणात संस्कार भारतीतर्फे २७ ला आयोजन
सकाळ वृत्तसेवा
चिपळूण, ता. १९ ः संस्कार भारती उत्तर रत्नागिरी जिल्हा शाखेच्यावतीने ‘चला करूया गणपती’ ही मातीपासून पर्यावरणपूरक गणेशमूर्ती तयार करण्याची एकदिवसीय कार्यशाळा २७ जुलैला आयोजित करण्यात आली आहे. या कार्यशाळेत मुलांना भारतीय संस्कृतीची जाणीव करून देत कलात्मकतेचा विकास घडवण्याचा उद्देश असून, यासाठी प्रशिक्षक म्हणून संतोष केतकर आणि सुनील खेडेकर मार्गदर्शन करणार आहेत.
ही कार्यशाळा सकाळी ९.३० वाजता बेंदरकर आळी येथील रा. स्व. संघाच्या कार्यालयात होणार असून, सायंकाळी ५ पर्यंत प्रशिक्षण दिले जाणार आहे. पाचवीपासून पुढील वयोगटातील कोणीही यात सहभागी होऊ शकतो; मात्र कार्यशाळेच्या व्यवस्थापनासाठी २२ जुलैपर्यंत नावनोंदणी करणे आवश्यक आहे. प्रशिक्षणासाठी लागणारी माती आयोजकांकडून पुरवण्यात येणार असली तरी ५ इंच बाय अर्धा इंच आकाराचे लाकडी कोरणे, १ फूट बाय १ फूट आकाराचा जाड पुठ्ठा किंवा प्लायवूड, हात पुसायला कपडा, जेवणाचा डबा आणि पाण्याची बाटली प्रशिक्षणार्थींनी आणायची आहे. या कार्यशाळेनंतर ३ ऑगस्टला रंगकाम प्रशिक्षण घेण्यात येणार असून, त्या दिवशी पोस्टर रंग, रंग करण्यासाठी डिश, पाण्यासाठी भांडे आणि १ व ८ क्रमांकाचे ब्रश प्रशिक्षणार्थींनी बरोबर आणावे. रंगकामानंतर प्रत्येकजण आपली मूर्ती घरी घेऊन जाईल. मूर्ती न नेणाऱ्यांची मूर्ती आयोजकांकडून विसर्जित करण्यात येईल. या उपक्रमासाठी अधिक माहितीसाठी संतोष केतकर, मंगेश बापट यांच्याशी संपर्क साधावा.