79394

लोकसेवा संघ कुडाळच्या
अध्यक्षपदी प्रसाद रेगे

उपाध्यक्षपदी दादा बेळणेकर

सकाळ वृत्तसेवा
कुडाळ, ता. २३ ः लोकसेवा संघ कुडाळ संस्थेच्या अध्यक्षपदी प्रसाद रेगे, उपाध्यक्षपदी बाळकृष्ण उर्फ दादा बेळणेकर यांची बिनविरोध निवड करण्यात झाली. लोकसंघ कुडाळ या संघटनेची पंचवार्षिक निवडणूक कालावधी मुदत संपल्यामुळे संस्था कार्यालय सभागृहामध्ये सर्वसामान्य सभा आयोजित करण्यात आली.
या सभेमध्ये २०२५ ते ३० या पाच वर्षांच्या कालावधीसाठी संचालक मंडळ निवड करणे हा प्रमुख विषय होता. सिंधुदुर्ग जिल्हा बँक माजी अध्यक्ष आर. टी. मर्गज यांच्या प्रमुख उपस्थितीत संस्थेच्या कार्यकारी मंडळाची बिनविरोध निवड झाली. इतर पदाधिकारी असे ः सचिव उत्तम सराफदार, मुख्य कार्यकारी अधिकारी आत्माराम राऊळ, खजिनदार गणपत चव्हाण. संचालक म्हणून सुभाष भिसे (माणगाव), रमण वायंगणकर (वेंगुर्ले), विनोद मर्गज (कणकवली), विलासराव ऐनापुरे (देवगड) यांची संचालकपदी निवड झाली. संस्था संस्थापक सदस्य राम प्रभू, रामानंद शिरोडकर यांनी कार्यकारी मंडळाचे अभिनंदन केले. मर्गज यांनी संस्था कोणत्या परिस्थितीमध्ये कार्यरत आहे, शासनाचे नियम व आदेशांबाबत आज संस्थांची काय स्थिती आहे, याबाबत मार्गदर्शन केले.