मालवणात शनिवारी
सुवर्णमहोत्सव सांगता
मालवण : भंडारी एज्युकेशन सोसायटी संचलित येथील भंडारी ए. सो. कनिष्ठ महाविद्यालयाच्या सुवर्णमहोत्सवी वर्षाचा सांगता समारंभ शनिवारी (ता. २६) सकाळी १० वाजता मालवण बाजारपेठेतील संस्थेच्या भंडारी हॉल येथे होणार आहे. सकाळी ९ वाजता माजी विद्यार्थी, प्रसिद्ध संगीतकार गायक शिवहरी रानडे यांचा संगीत कार्यक्रम होईल. प्रमुख पाहुणे म्हणून चराठा, सावंतवाडी येथील भोसले नॉलेज सिटीचे कार्याध्यक्ष अच्युत सावंत-भोसले, कार्यक्रमाचे अध्यक्ष भंडारी एज्युकेशन सोसायटीचे ऑनररी जनरल सेक्रेटरी साबाजी करलकर उपस्थित राहणार आहेत. वक्तृत्व स्पर्धेतील विजेत्यांचा गौरव, ‘सुवर्णभरारी’ स्मरणिकेचे प्रकाशन होईल.
.................
पिंगुळी येथे आज
विद्यार्थी गुणगौरव
कुडाळ ः दहावी, बारावी उत्तीर्ण विद्यार्थ्यांचा कौतुक सोहळा आणि करिअर मार्गदर्शन कार्यक्रम उद्या (ता. २४) सायंकाळी ७ वाजता सामाजिक कार्यकर्ते सुनील पालव यांच्या निवासस्थानी पिंगुळी शेटकरवाडी येथे आयोजित केला आहे. कार्यक्रमात माजी गटविकास अधिकारी बाळकृष्ण परब, जीवनविद्या मिशनचे संदीप परब मार्गदर्शन करणार आहेत. दहावी, बारावीमध्ये यश प्राप्त केलेल्या विद्यार्थ्यांना योग्य मार्गदर्शन मिळावे, यासाठी कार्यक्रमाचे आयोजन केले आहे, अशी माहिती निमंत्रक सुनील पालव, प्रसाद दळवी दिली. पाल्यांसमवेत उपस्थित राहावे, असे आवाहन केले आहे.
...................
साहित्य कट्ट्याचा
उद्या कार्यक्रम
सावंतवाडी ः आजगाव (सिंधुदुर्ग) येथील साहित्य प्रेरणा कट्ट्याचा सलग सत्तावन्नावा मासिक कार्यक्रम शुक्रवारी (ता. २५) सायंकाळी ५.३० वाजता शिरोडा येथील र. ग. खटखटे ग्रंथालयात आयोजित करण्यात आला आहे. पुस्तक चर्चेसाठी आयोजित केलेल्या या कार्यक्रमात शेखर पणशीकर, सोमा गावडे, स्नेहा नारिंगणेकर आणि सरोज रेडकर हे वाचक ‘बिजली आणि वादळ’, ‘चमत्कारामागील विज्ञान’, ‘भाकरी आणि फूल’ अशा त्यांना भावलेल्या पुस्तकाविषयी विवेचन करणार आहेत. त्यानंतर त्यावर चर्चा होईल. या कार्यक्रमास साहित्यप्रेमींनी उपस्थित राहावे, असे आवाहन साहित्य प्रेरणा कट्ट्याचे समन्वयक विनय सौदागर यांनी केले आहे.
...................
असनियेत उद्या
धार्मिक कार्यक्रम
ओटवणे ः असनियेचे ग्रामदैवत श्री देवी माऊली मंदिरात श्रावणमासनिमित्त शुक्रवारी (ता. २५) लघुरुद्र व लघुविष्णू या धार्मिक कार्यक्रमांचे आयोजन केले आहे. मंदिरात दररोज सकाळी ८.३० वाजता लघुरुद्र, ९.३० वाजता लघुविष्णू, दुपारी १ वाजता आरती, १.३० वाजता महाप्रसाद आदी कार्यक्रम होणार आहेत. भाविकांनी या कार्यक्रमांचा लाभ घ्यावा, असे आवाहन श्री माऊली देवस्थानचे सर्व मानकरी आणि असनिये ग्रामस्थांनी केले आहे.