किंजवडेत साकव डागडुजीला
पालकमंत्री राणेंकडून मंजुरी

सकाळ वृत्तसेवा
देवगड, ता. २३ ः तालुक्यातील किंजवडे खालचीवाडी-बाईतवाडी-कदमवाडीकडे जाणाऱ्या साकवाला पालकमंत्री नीतेश राणे यांच्या माध्यमातून प्राधान्याने मंजुरी मिळाली आहे. त्यामुळे ग्रामस्थांची साकव दुरुस्तीची अनेक वर्षांची मागणी पूर्णत्वास जाणार असल्याचा दावा सरपंच संतोष किंजवडेकर यांनी केला आहे.
तालुक्यातील किंजवडे येथील खालचीवाडी -बाईतवाडी -कदमवाडीकडे जाणाऱ्या साकवाची दुरुस्ती करण्याची स्थानिकांची मागणी होती. साकव धोकादायक बनला असल्याचे स्थानिकांकडून सांगितले जात होते. त्यामुळे अनेकदा हा विषय चर्चेत आला होता. मात्र, आता या साकवाच्या डागडुजीला पालकमंत्री श्री. राणे यांच्या माध्यमातून निधी उपलब्ध झाला असून त्याचे संपूर्ण नूतनीकरण होणार असल्याचे श्री. किंजवडेकर यांनी सांगितले. त्यांच्या माहितीनुसार, संबंधित साकव सुमारे ७६ मीटर लांबीचा आहे. या साकवाला ‘साकव कार्यक्रमां’तर्गत पुरेसा निधी उपलब्ध होत नव्हता. त्यामुळे त्याची पूर्ण डागडुजी होत नव्हती. मात्र, आता पालकमंत्री श्री. राणे यांनी २०२५-२६ या आर्थिक वर्षात सुमारे ३० लाख रुपये मंजूर केले आहेत. जिल्ह्यामध्ये एकूण ४०६ साकव नादुरुस्त असताना प्राधान्याने किंजवडे गावाला मंजुरी दिल्याचा दावा त्यांनी केला. याबद्दल श्री. किंजवडेकर यांनी पालकमंत्री श्री. राणे यांचे आभार मानले.