N79438

मोकाट गुरे, कुत्र्यांचा बंदोबस्त करा

कणकवली भाजप शहर युवा मोर्चाची पालिकेकडे मागणी

सकाळ वृत्तसेवा
कणकवली, ता. २३ ः शहरात फिरणारी मोकाट गुरे आणि भटक्या कुत्र्यांचा बंदोबस्त करा, अशी मागणी भाजप युवा मोर्चा शहर विभागातर्फे आज करण्यात आली. याबाबतचे निवेदन शहर मोर्चाचे चिटणीस ऋतिक नलावडे आणि इतरांनी आज मुख्याधिकारी गौरी पाटील यांना दिले.
निवेदनात म्‍हटले आहे की, कणकवली नगरपंचायतीच्या सर्वच प्रभागात भटक्‍या कुत्र्यांचा उपद्रव वाढला आहे. रात्रीच्या वेळेसही कुत्री दुचाकी, चारचाकींचा पाठलाग करतात. यात अपघातही होत आहेत. भटक्‍या कुत्र्यांप्रमाणे शहरात मोकाट जनावरांचाही मोठा वावर आहे. शहर बाजारपेठ, नाथ पै नगर, कनकनगर तसेच इतर रस्त्यांवर ही मोकाट जनावरे दिवसरात्र फिरत असतात. मुख्याधिकाऱ्यांना निवेदन देताना ऋतिक नलावडे यांच्यासह सिद्धेश वालावलकर, बाळा डिचोलकर, चेतन पवार, गोपाळ बागायतकर आदी उपस्थित होते.
---
मोकाटे गुरे कोंडवाड्यात ठेवा
कणकवली नगरपंचायतीवर लोकनियुक्‍त कार्यकारिणी असताना भटक्‍या कुत्र्यांचे निबिर्जीकरण केले होते. त्‍यामुळे त्‍यांचा उपद्रव कमी झाला होता. तर शहरालगतच्या गोपुरी आश्रमात भटकी जनावरे नेऊन बांधली जात होती. त्‍याच धर्तीवर शहरातील मोकाट जनावरे गोपुरी आश्रमातील कोंडवाड्यामध्ये ठेवली जावीत. त्‍यासाठीची कार्यवाही नगरपंचायतीने करावी. याखेरीज भटक्‍या कुत्र्यांचे निर्बिजीकरण करावे अशी मागणी केली आहे.