79494

आजगाव ग्रामपंचायतीकडून
आरोग्य उपकेंद्रास औषधे
सकाळ वृत्तसेवा
बांदा, ता. २३ः आजगाव येथील प्राथमिक आरोग्य उपकेंद्रास आजगाव ग्रामपंचायतीमार्फत १५ व्या वित्त आयोग निधीतून औषध पुरवठा उपलब्ध करून देण्यात आला. यात १० हजार रक्तदाब गोळ्या, पाच हजार कॅल्शियम व्हिटॅमिन डी, पाच हजार हिमोग्लोबीन गोळ्या, दोन कफ सायरप कॅन आणि काही मलम ट्यूब अशी औषधे देण्यात आली.
हा औषध साठा सुपूर्द करताना आजगाव सरपंच यशश्री सौदागर म्हणाल्या की, या औषधांचा वापर उपकेंद्रांतर्गत येणाऱ्या गावातील रुग्णांना होणार आहे. यापुढेही ग्रामपंचायतीमार्फत या उपकेंद्राला सहकार्य केले जाईल, असे आश्वासन दिले. यावेळी उपस्थित उपकेंद्रातील अधिकाऱ्यांनी सांगितले की, मागील काही दिवसांपासून रुग्णांना औषध पुरवठा करताना खूप कसरत करावी लागत होती. ही समस्या सरपंच, उपसरपंच व सदस्यांच्या कानावर घातली. त्यावेळी ग्रामपंचायतीने तत्काळ या समस्यांबाबत दखल घेत औषध पुरवठा उपलब्ध करून दिल्याबद्दल त्यांनी आभार मानले.
यावेळी उपकेंद्र आरोग्य अधिकारी डॉ. सायली, आजगाव सरपंच यशश्री सौदागर, उपसरपंच सुशील कामटेकर, ग्रामपंचायत सदस्य बाळू पांढरे, राकेश सावंत, सेजल रेडकर, वर्षा रेवाडकर, वैष्णवी आजगावकर, ग्रामपंचायत अधिकारी संदीप गवस, आजगाव उपकेंद्र आरोग्य सेविका श्रीमती कानसे, आरोग्य सेवक प्रसाद जोशी, आशा सेविका उपस्थित होते.