साडीला झळ लागून
वृद्ध महिलेचा मृत्यू
दापोली ः कोळथरे (गोलांबडेवाडी) येथे वृद्ध महिलेचा चुलीजवळ बसलेली असताना साडीने पेट घेतल्याने भाजून मृत्यू झाला. सुनीता शांताराम फिलसे (वय ६८) असे त्या वृद्धेचे नाव आहे. ही घटना २१ जुलैला संध्याकाळी साडेसहा वाजण्याच्या सुमारास घडली. फिलसे या घरातील चुलीजवळ बसल्या असताना त्यांच्या साडीचा पदर चुलीत पडला आणि त्याने पेट घेतला. आग पसरून त्या गंभीररीत्या भाजल्या. त्यानंतर शेजाऱ्यांनी तत्काळ उपजिल्हा रुग्णालयात दाखल केले; मात्र ८० टक्क्यांहून अधिक भाजल्यामुळे त्यांची प्रकृती अत्यवस्थ झाली होती. अखेर २२ जुलैला पहाटे उपचारादरम्यान त्यांचा मृत्यू झाला. या दुर्दैवी घटनेमुळे परिसरात हळहळ व्यक्त केली जात असून पुढील तपास दाभोळ पोलिस करत आहेत.