79936

मालवणातील नागरिक विविध समस्यांमुळे बेजार

ठाकरे गट; जिल्हाधिकऱ्यांना निवेदन, दखल घेण्याची मागणी

सकाळ वृत्तसेवा
मालवण, ता. २५ : शहरातील विविध समस्यांबाबत शिवसेना उद्धव बाळासाहेब ठाकरे पक्षाच्या येथील पदाधिकाऱ्यांनी माजी आमदार वैभव नाईक यांच्या समवेत जिल्हाधिकारी अनिल पाटील यांची भेट घेतली. यावेळी संबंधित समस्यांचे निवेदन जिल्हाधिकाऱ्यांना दिले. शिवसेना पदाधिकाऱ्यांच्या मागणीनुसार नगरपरिषदेअंतर्गत असलेल्या समस्या सोडविण्यासाठी ३१ जुलै रोजी पालिकेत आढावा बैठक घेण्याचे जिल्हा नगरविकास अधिकाऱ्यांनी यावेळी मान्य केले. तर इतर समस्या मार्गी लावण्याची ग्वाही जिल्हाधिकाऱ्यांनी दिली.
निवेदनात म्हटले आहे की, मालवणमध्ये मत्स्यआयुक्त अधिकारी कायमस्वरूपी नसल्याने किनारपट्टी भागातील मच्छीमारी करणाऱ्या लोकांना अनेक सोयी सुविधांपासून वंचित रहावे लागत आहे. शहरात पोलिसपाटील पद नेमलेले नसल्याने नागरिकांना वारस तपास दाखला व अन्य समस्या उद्‌भवत आहेत. शहराच्या विकासासाठी मालवण पालिकेत कायमस्वरूपी मुख्याधिकाऱ्यांची नेमणूक करावी. शहरातील बंदर जेटी येथे रस्त्याच्या काँक्रिटीकरणाचे काम निकृष्ट दर्जाचे झाले असून त्या कामाची सखोल चौकशी करून ठेकेदारावर योग्य कार्यवाही करावी, अशी मागणी निवेदनाद्वारे केली आहे. यावेळी माजी उपनगराध्यक्ष महेश जावकर, माजी बांधकाम सभापती महेंद्र म्हाडगुत, तालुकाप्रमुख हरी खोबरेकर, शहरप्रमुख बाबी जोगी, उमेश मांजरेकर, दांडी उपशहर प्रमुख हेमंत मोंडकर आदी उपस्थित होते.