rat25p21.jpg
KOP25N79879
असोंड येथील नदीच्या पात्राबाहेर दिसलेली मगर.
------------
असोंड गावातील नदीकिनारी
मगर आढळल्याने घबराट
गावतळे, ता. २५ ः दापोली तालुक्यातील असोंड गावातील नदीकिनारी २४ जुलैला दुपारी दोनच्या सुमारास मगर आढळून आल्याने ग्रामस्थांमध्ये घबराट पसरली आहे.
वाकवली-उन्हवरे रस्त्यावरील असोंड हे एक महत्वाचे गाव असून २४ जुलैला दुपारी गावातील तंटामुक्ती अध्यक्ष रूपेश बुरबाडकर हे नदीकिनारी गेले असता नदीपात्राबाहेर मगर दिसली. त्यांनी तत्काळ सरपंच, उपसरपंच, पोलिस पाटील यांना याची माहिती दिली. बळीराजा शेतकरी संघटनेचे जिल्हाध्यक्ष गणेश देवघरकर यांनी तत्काळ वनविभागाला फोन करून माहिती दिली. वनाधिकारी दापोली प्रकाश पाटील आणि त्याचे सहकाऱ्यांनी शुक्रवारी (ता. २५) जागेची पाहणी केली. ही नदी वाकवली-उन्हवरे या मुख्य रस्त्यावर असलेल्या पुलाखालून वाहते. या रस्त्यावर दिवसभर रहदारी असते तसेच या भागात शेतकरी जनावरे चरावयास आणतात. नदी असल्याने या ठिकाणी खेकडे आणि मासे पकडण्यासाठी ग्रामस्थ येत असतात. या भागात शेती असल्याने ग्रामस्थांची ये-जा असते. त्यामुळेच गावातील ग्रामस्थ भयभीत झाले आहेत. या मगरीला ताबडतोब पकडून ग्रामस्थांना दिलासा द्यावा, असे उपसरपंच दीपक देवरूखकर यांनी सांगितले आहे.

कोट
असोंड येथील नदीकिनारी परिसरात पाहणी केली आहे. ग्रामस्थांनी किनारी भागात मगर पाहिल्याचे सांगितले आहे. त्यामुळे सुरक्षिततेसाठी तिथे गस्त घालणार आहोत.
- प्रकाश पाटील, वनाधिकारी, दापोली.