मिरकरवाडा बंदरात होणार २२ कोटींची कामे
उद्या भूमिपूजन ; बंदरविकास मंत्री राणेंची उपस्थिती
सकाळ वृत्तसेवा
रत्नागिरी, ता. २५ : मिरकरवाडा बंदरा टप्पा २ अंतर्गत विकास करण्यासाठी शासनाकडून ११३ कोटीच्या निधीला प्रशासकीय मान्यता यापूर्वी देण्यात आली आहे. दुसऱ्या टप्प्याअंतर्गत या बंदराला २२ कोटी रुपये मंजूर झाले आहेत. या अंतर्गत महत्त्वाची ९ विकासकामे घेतली जाणार आहेत. त्यामध्ये कंपाऊंड वॉल, प्रसाधनगृह, लिलाव हॉल, जेटींची दुरुस्ती, शेड, अंतर्गत रस्ते आदींचा समावेश आहे. या कामांचा भूमिपूजन समारंभ रविवारी (ता. २७) राज्याचे मत्स्य व बंदरविकास मंत्री नितेश राणे यांच्या हस्ते होणार आहे.
राज्याच्या नुकत्याच झालेल्या पावसाळी अधिवेशनात मत्स्य व बंदर विकासमंत्री नितेश राणे यांनी मिकरवाडा बंदराच्या विकासाकडे लक्ष वेधले. मिरकरवाडा बंदर टप्पा २ अंतर्गत विकासासाठी निधी उपलब्ध आहे; पण तो खर्च करू शकलो नसल्याचे त्यांनी सांगितले. या दुसऱ्या टप्प्यातील २२ कोटीला मान्यता मिळाल्यानंतर यामध्ये महत्त्वाची ९ विकासकामे केली जाणार आहेत. कंपाऊंड वॉल, लिलावगृह, जाळे विणण्याच्या शेड, निवाराशेड, धक्का व जेटी दुरूस्ती, अंतर्गत रस्ते, वर्कशॉप बांधणे, प्रशासकीय इमारत, उपहारगृह, रेडिओ कम्युनिकेशन सेंटर, प्रसाधगृह आदींचा समावेश आहे.
मिरकरवाडा मासेमारी बंदराच्या या विकासकामांचा भूमिपूजन समारंभ रविवारी (ता. २७) सकाळी १० वाजता होणार आहे. महाराष्ट्र मत्स्योद्योग विकास महामंडळ मर्यादित, मुंबई यांच्यावतीने केंद्र व राज्य पुरस्कृत योजनेअंतर्गत हा प्रकल्प हाती घेण्यात आला आहे. या वेळी खासदार नारायण राणे, खासदार सुनील तटकरे, मत्स्य आणि बंदर विकास मंत्री नितेश राणे, पालकमंत्री उदय सामंत, गृहराज्यमंत्री योगेश कदम आदी उपस्थित राहणार आहेत.