रेल्वेच्या धडकेत वृद्धाचा मृत्यू
घाटीवळेतील घटना; टीशर्टमुळे ओळख पटली
सकाळ वृत्तसेवा
देवरूख ता. २६ : संगमेश्वर तालुक्यातील घाटीवळे रेल्वेबोगद्यात रेल्वेरूळ ओलांडताना रेल्वेची धडक बसून लांज्यातील वृद्धाचा मृत्यू झाला. गुरूवारी (ता. २४) दुपारी ही घटना घडली.
सीताराम भिवा दरडे (वय ७०, रा. आडवली चौक, लांजा) असे मृत व्यक्तीचे नाव आहे. दरडे हे आपल्या वाडीकडे जात असताना वाट चुकून घाटीवळे येथील रेल्वेट्रॅकच्या दिशेने गेले. दुपारी सुमारे ३ वाजण्याच्या सुमारास ट्रॅकवरून जात असताना रत्नागिरीकडून येणाऱ्या मंगला एक्स्प्रेसने घाटीवळे बोगद्याजवळ त्यांना धडक दिली. ही धडक इतकी भीषण होती की, त्यांचा जागीच मृत्यू झाला. अपघातानंतर पोलिसांसमोर मृतदेहाची ओळख पटवण्याचे मोठे आव्हान होते; मात्र, मृत दरडे यांनी परिधान केलेल्या टी-शर्टवर त्यांच्या गावाचे नाव ‘आडवली’ छापलेले होते. त्याच्या आधारावर पोलिसांनी तपास सुरू केला आणि अल्पावधीतच मृताचे पूर्ण नाव व पत्ता समजून आला. देवरूख पोलिस ठाण्याचे निरीक्षक उदय झावरे यांनी घटनास्थळी भेट देऊन पाहणी केली. या वेळी साहाय्यक उपनिरीक्षक एस. एस. पंदेरे, हवालदार प्रशांत मसुरकर, सचिन कामेरकर, संजय कारंडे आणि महिला कॉन्स्टेबल रेणुका कांबळे हे अधिकारी उपस्थित होते. या घटनेची देवरूख पोलिस ठाण्यात आकस्मिक मृत्यू म्हणून नोंद करण्यात आली आहे. मृतदेहाचे देवळे प्राथमिक आरोग्यकेंद्रात विच्छेदन करण्यात आले. त्यानंतर मृतदेह नातेवाइकांच्या ताब्यात देण्यात आला.